Հունիսի 25-ին հարձակում է եղել Հորմուզի նեղուցով անցնող առևտրային նավի վրա։ CNN-ի փոխանցմամբ՝ ամերիկացի պաշտոնյաներից մեկը հայտնել է, որ նավը թիրախավորվել է իրանական անօդաչու թռչող սարքի կողմից, սակայն այլ մանրամասներ չի հաղորդել։
Հարձակման պատճառով ՄԱԿ-ի Միջազգային ծովային կազմակերպությանը կանգնեցրել է Պարսից ծոցում արգելափակված հարյուրավոր նավերի և ավելի քան 11,000 նավաստիների տարհանման գործողությունը:
Թեև Իրանը պաշտոնապես չի ստանձնել հարվածի պատասխանատվությունը, միջադեպը տեղի է ունեցել Իսլամական հեղափոխության պահապանների կորպուսի կոշտ հայտարարությունից ժամեր անց, որով նախազգուշացվել էր, որ նավերի անվտանգ անցումը թույլատրվելու է բացառապես իրանական կողմի սահմանած երթուղիներով։
Հիշեցնենք, որ ԻՀՊԿ ռազմածովային ուժերը Հորմուզի նեղուցով նավագնացության նոր երթուղիների ներդրման վերաբերյալ հայտարարություն էր տարածել՝ ընդգծելով,որ առանց Թեհրանի համաձայնության սահմանված ցանկացած նոր ուղի անօրինական է և վտանգավոր։
Ավելի վաղ Օմանը հայտնել էր Հորմուզի նեղուցով նավերի անցման համար ժամանակավոր ծովային միջանցք բացելու մասին։ Ըստ Օմանի ԱԳՆ-ի՝ նախաձեռնությունն իրականացվել է Միջազգային ծովային կազմակերպության (ՄԾԿ) հետ համակարգման շրջանակում՝ նպատակ ունենալով ապահովել նավարկության անվտանգությունն ու համաշխարհային առևտրի անխափան շարունակականությունը:
Հետևեք մեզ տելեգրամում
