ԱՄՆ-ն և Իրանը համաձայնության են եկել դադարեցնել վերջին ռազմական գործողությունները և վերսկսել բանակցությունները Հորմուզի նեղուցի շուրջ տարաձայնությունների վերաբերյալ։ Այս մասին «Reuters»-ին հայտնել է ամերիկացի պաշտոնյան։
Նրա խոսքով՝ կողմերը պայմանավորվել են առայժմ դադարեցնել ռազմական գործողությունները, իսկ հունիսի 17-ին ստորագրված 14 կետից բաղկացած հուշագրի բոլոր դրույթների շուրջ տեխնիկական բանակցությունները կշարունակվեն։ «Reuters»-ի փոխանցմամբ՝ բանակցությունների հաջորդ փուլը նախատեսվում է անցկացնել երեքշաբթի Կատարում։
Համաձայնությունը ձեռք է բերվել մի քանի օր տևած փոխադարձ հարվածներից հետո։ Իրանը կիրակի հրթիռային և անօդաչու թռչող սարքերի հարվածներ էր հասցրել ԱՄՆ ռազմական օբյեկտներին Բահրեյնում և Քուվեյթում՝ մեղադրելով Վաշինգտոնին հրադադարը խախտելու մեջ։ ԱՄՆ-ն էլ ավելի վաղ հայտարարել էր, որ նոր հարվածներ է հասցրել Իրանին՝ Հորմուզի նեղուցում նավի վրա հարձակման հետևանքով։ Դրանից առաջ ԱՄՆ նախագահ Դոնալդ Թրամփը հայտարարել էր, որ եթե Իրանը չպահպանի պայմանավորվածությունները, Վաշինգտոնը կարող է «ռազմական ճանապարհով ավարտին հասցնել սկսած գործը»։
Միաժամանակ Իսրայելը հայտնել է, որ նոր հարվածներ է հասցրել Լիբանանի հարավում «Հեզբոլլահի» ենթակառուցվածքներին, մինչդեռ Թեհրանը պնդում է, որ Լիբանանում ռազմական գործողությունների դադարեցումը լայն համաձայնության պահպանման կարևոր պայմաններից է։
Հետևեք մեզ տելեգրամում
