Պուտինը խոստովանել է Ռուսաստանում վառելիքի պակասի առկայությունը` ուկրաինական հարվածների ֆոնին

Ռուսաստանի նախագահ Վլադիմիր Պուտինը ընդունել է, որ երկրում նկատվում է վառելիքի «որոշակի դեֆիցիտ»՝ ուկրաինական հարվածների հետևանքով նավթավերամշակման գործարաններին։

Նրա խոսքով՝ Ուկրաինայի կողմից էներգետիկ ենթակառուցվածքներին հասցվող հարվածները «ստեղծում են խնդիրներ», սակայն իրավիճակը «կտրուկ կամ կրիտիկական չէ»։

Պուտինը նշել է, որ վնասված օբյեկտները արագ վերականգնվում են, իսկ առաջացած դժվարությունները «չեն հասնում ճգնաժամային մակարդակի»։ «Վնաս կա, բայց իրավիճակը կայուն է և ունի մեծ անվտանգության պաշար», – ասել է նա։

Նա նաև հայտարարել է, որ Ռուսաստանը կուժեղացնի էներգետիկ ենթակառուցվածքների պաշտպանությունը և կընդլայնի վառելիքի արտադրությունը։ Միաժամանակ Պուտինը նշել է, որ ուկրաինական հարվածների նպատակը, իր գնահատմամբ, ներքին լարվածություն ստեղծելն է և Ռուսաստանի ռազմական գործողությունների դանդաղեցումը։

«Euronews»-ի փոխանցմամբ՝ վերջին շրջանում Ռուսաստանում որոշ շրջաններում արդեն նկատվում են վառելիքի սահմանափակումներ իսկ որոշ տարածքներում արձանագրվել են էներգիայի անջատումներ՝ ենթակառուցվածքներին հասցված հարվածների ֆոնին։