Ադրբեջանի նախագահ Իլհամ Ալիևը հայտարարել է, որ Բաքուն շարունակում է լրջորեն քննարկել Եվրոպայի խորհրդից դուրս գալու հնարավորությունը։
Շուշիում անցկացվող «Գլոբալ մեդիաֆորումի» բացման ժամանակ ունեցած ելույթում Ալիևն ասել է, որ Եվրոպայի խորհրդի գլխավոր քարտուղարը դիմել է Ադրբեջանին՝ խնդրելով չգնալ այդ քայլին, ինչից հետո գործընթացը ժամանակավորապես դադարեցվել է։
«Ադրբեջանը լրջորեն քննարկում է Եվրոպայի խորհրդից դուրս գալու հնարավորությունը։ Եվրոպայի խորհրդի գլխավոր քարտուղարը մեզ խնդրեց չանել այդ քայլը, ինչից հետո գործընթացը կանգ առավ», – նշել է Ադրբեջանի նախագահը։
Նրա խոսքով՝ այդ ժամանակից ի վեր իրավիճակը չի փոխվել, իսկ Եվրոպայի խորհրդի խորհրդարանական վեհաժողովի (ԵԽԽՎ) կողմից Բաքվին ներկայացված պահանջները շարունակում են անընդունելի մնալ Ադրբեջանի համար։
Ալիևը հայտարարել է, որ ԵԽԽՎ-ն պետք է վերականգնի ադրբեջանական պատվիրակության լիազորությունները, ինչից հետո միայն Ադրբեջանը կարող է վերադառնալ կազմակերպության աշխատանքներին։ Նա նաև նշել է, որ եվրոպական կառույցները պետք է «քաջություն ունենան ընդունելու իրենց թույլ տված լուրջ սխալը»։
Հիշեցնենք, որ 2024 թվականի հունվարի 24-ին ԵԽԽՎ-ն հրաժարվեց վավերացնել Ադրբեջանի պատվիրակության լիազորությունները, ինչից հետո Բաքուն հայտարարեց Վեհաժողովի հետ համագործակցությունն ու իր մասնակցությունը դադարեցնելու մասին։ Նույն ժամանակահատվածում Ադրբեջանի իշխանությունները սկսեցին նաև Եվրոպայի խորհրդից դուրս գալու և Մարդու իրավունքների եվրոպական դատարանի իրավազորությունից հրաժարվելու հնարավորության քննարկումը։
Հետևեք մեզ տելեգրամում
