74 տարեկան հասակում մահացել է Կատարի նախկին էմիր շեյխ Համադ բին Խալիֆա ալ Թանին, որը երկիրը ղեկավարել է 1995-ից մինչև 2013 թվականը։ Այս մասին հայտնել է երկրի բարձրագույն պետական մարմինը՝ Էմիրական դիվանը: Փոխանցում է «Ալ-Ջազիրան»:
«Աստծո կամքի ու ճակատագրի հանդեպ հաստատուն հավատով Էմիրական դիվանը սգում է ազգի մեծ կորուստը. կյանքից հեռացել է Նորին Մեծություն Հայր էմիր շեյխ Համադ բին Խալիֆա ալ Թանին (թող Աստված ողորմի նրան): Նա մահացել է կիրակի առավոտյան»,- նշվել է սոցիալական ցանցերում տարածված պաշտոնական հայտարարության մեջ։ Մահվան հստակ պատճառը չի հաղորդվում։ Երկրում հայտարարվել է քառօրյա ազգային սուգ։
Նշենք, որ շեյխ Համադը հայտնի է որպես ժամանակակից Կատարի գլխավոր ճարտարապետներից մեկը։ Նրա ղեկավարման 18 տարիների ընթացքում Կատարը հսկայական տնտեսական թռիչք է գրանցել՝ վերածվելով աշխարհում հեղուկացված բնական գազի խոշորագույն արտահանողի և մեկ շնչին ընկնող եկամտով ամենահարուստ երկրներից մեկի։
Համադ բին Խալիֆան իշխանության է եկել 1995 թվականին՝ պալատական հեղաշրջման արդյունքում։ Արաբական միապետությունների համար անսովոր ավանդույթով՝ 2013 թվականի հունիսին նա կամավոր հրաժարվել է գահից և իշխանությունը փոխանցել իր որդուն՝ գործող էմիր Շեյխ Թամիմ բին Համադ Ալ Թանիին։
Հետևեք մեզ տելեգրամում
