ՀԱՄԱՍ-ի քաղբյուրոյի նոր ղեկավար Խալիլ ալ-Հայյան իր պաշտոնավարման առաջին քաղաքական ելույթում կոչ է արել միավորել պաղեստինյան բոլոր քաղաքական ուժերին և անհապաղ սկսել համազգային երկխոսություն։ Այս մասին հայտնել է «ՏԱՍՍ» լրատվական գործակալությունը՝ հղում անելով ՀԱՄԱՍ-ի թելեգրամյան ալիքին։
Նոր ղեկավարի խոսքով՝ պաղեստինյան ժողովրդի միասնության ապահովումը շարժման գլխավոր առաջնահերթություններից է՝ պաղեստինցիների օրինական իրավունքների պաշտպանության, Գազայի հատվածում արյունահեղության դադարեցման, բնականոն կյանքի վերականգնման և բնակչության տեղահանման կանխարգելման հետ մեկտեղ։
«Մենք ձեռք ենք մեկնում պաղեստինյան բոլոր խմբավորումներին և քաղաքական ուժերին՝ միավորվելու ընդհանուր հիմքի շուրջ՝ համաձայնեցված ազգային ծրագրի շրջանակում, որը կարտացոլի մեր ժողովրդի առաջնահերթություններն ու նպատակները»,- հայտարարել է ալ-Հայյան՝ ընդգծելով, որ ներկա փուլում միակողմանի գործողություններն անընդունելի են։
Նա նաև ընդգծել է անհապաղ ազգային երկխոսություն սկսելու անհրաժեշտությունը՝ մշակելու պաղեստինյան ազգային ինստիտուտների, առաջին հերթին՝ Պաղեստինի ազատագրման կազմակերպության, վերակազմավորման մեխանիզմները։ Ալ-Հայյայի խոսքով՝ այդ գործընթացը պետք է իրականացվի ժողովրդավարական սկզբունքներով և ազգային համաձայնության հիման վրա՝ ապահովելով պաղեստինյան բոլոր քաղաքական ուժերի լիարժեք մասնակցությունը որոշումների կայացմանն ու ազգային ռազմավարության իրականացմանը։
Ելույթի ավարտին ՀԱՄԱՍ-ի առաջնորդը միջազգային հանրությանը և ՄԱԿ-ին կոչ է արել ապահովել Գազայի հատվածի խաղաղ բնակչության պաշտպանությունը և Իսրայելին պատասխանատվության ենթարկել, իր խոսքով, ռազմական հանցագործությունների համար։
Հիշեցնենք, որ հուլիսի 20-ին ՀԱՄԱՍ-ը հայտարարել էր, որ Գազայի հատվածում շարժման ղեկավար Խալիլ ալ-Հայյան ընտրվել է կազմակերպության քաղբյուրոյի ղեկավար։ Պաշտոնը թափուր էր մնացել 2024 թվականի հոկտեմբերից, երբ Իսրայելի ավիահարվածի հետևանքով Ռաֆահում սպանվել էր ՀԱՄԱՍ-ի առաջնորդ Յահյա Սինվարը։ Նա այդ պաշտոնում փոխարինել էր Իսմայիլ Հանիյեին, որը 2024 թվականի հուլիսին սպանվել էր Թեհրանում իրականացված իսրայելական հարձակման հետևանքով։ Սինվարի մահից հետո քաղբյուրոյի ղեկավարի գործառույթները ժամանակավորապես իրականացնում էր շարժման ղեկավարության խորհուրդը։
Հետևեք մեզ տելեգրամում
