Եմենի իրանամետ «Անսար Ալլահ» (հութիներ) շարժումը հայտարարել է, որ Կարմիր ծովում հարձակվել է Սաուդյան Արաբիային պատկանող երկու նավթատարի վրա՝ մեղադրելով դրանք իր կողմից հայտարարված ծովային շրջափակումը խախտելու մեջ, հայտնել է «Al Jazeera»-ն։
Շարժման ռազմական ներկայացուցիչ Յահյա Սարին հայտարարել է, որ թիրախավորվել են Encelia և Layla նավթատարները։
Սաուդյան պետական լրատվական գործակալությունը, հղում անելով երկրի Տրանսպորտի գլխավոր վարչությանը, հաստատել է, որ Encelia նավը հարվածի է ենթարկվել՝ նշելով, որ անձնակազմի բոլոր անդամներին վտանգ չի սպառնում։
Սաուդյան կողմը հայտարարել է, որ նման գործողությունները խախտում են միջազգային իրավունքի նորմերն ու առևտրային նավերի և նրանց անձնակազմերի անվտանգության վերաբերյալ միջազգային կոնվենցիաները։
Հութիների խոսքով՝ հարձակումներն իրականացվել են բալիստիկ և թևավոր հրթիռներով, ինչպես նաև անօդաչու թռչող սարքերով, ինչի հետևանքով նավերի վրա հրդեհ է բռնկվել։
Յահյա Սարին նաև պնդել է, որ հութիների գործողությունների հետևանքով մոտ տասը առևտրային նավ ստիպված է եղել փոխել երթուղին և վերադառնալ։
Միացյալ Թագավորության Ծովային առևտրի գործողությունների կենտրոնը նույնպես հայտնել է, որ ստացել է տեղեկություն նավթատարի վրա անհայտ զինամթերքով հարձակման մասին։
«Նավի կապիտանը հայտնել է, որ անհայտ արկի հարվածից հետո նավում հրդեհ է բռնկվել, որի մարման աշխատանքներն իրականացնում է անձնակազմը»,- նշված է կենտրոնի հաղորդագրության մեջ։
Հետևեք մեզ տելեգրամում
