Ռուսաստանի անասնաբուժական և բուսասանիտարական վերահսկողության դաշնային ծառայությունը (Ռոսսելխոզնադզոր) հայտարարել է, որ հուլիսի 27-ից սահմանափակվելու է Հայաստանից Ռուսաստան կաթնամթերքի մատակարարումը՝ հայաստանյան կաթնամթերք արտադրող ձեռնարկություններում հայտնաբերված խախտումների պատճառով։ «Ինտերֆաքս»-ի փոխանցմամբ՝ այս մասին հայտնել է ծառայությունը։
Գերատեսչության տարածած հաղորդագրության համաձայն՝ հուլիսի 14-21-ը Ռոսսելխոզնադզորի մասնագետները ստուգումներ են անցկացրել Հայաստանի կաթնամթերք վերամշակող ձեռնարկություններում, որոնք ռուսական շուկա էին արտահանում արտադրանք՝ Հայաստանի սննդամթերքի անվտանգության տեսչական մարմնի երաշխիքներով։
Ստուգումների արդյունքում, ըստ ռուսական կողմի, արձանագրվել են մի շարք խախտումներ։ Մասնավորապես, նշվում է, որ Ռուսաստանին մատակարարվող արտադրանքի արտադրության համար օգտագործվել է հիվանդ կենդանիներից ստացված կաթ։ Բացի այդ, հաստատվել են երրորդ երկրներից ներկրված հումքի օգտագործման դեպքեր՝ բարձր յուղայնությամբ կաթնամթերքի արտադրության մեջ, չնայած Հայաստանի անասնաբուժական ծառայության նախկին հավաստիացումներին, թե օգտագործվում է միայն հայկական կամ ԵԱՏՄ անդամ երկրների ծագման հումք։
Ռոսսելխոզնադզորը նաև նշել է, որ ստուգումները կրկին հաստատել են այն խախտումները, որոնք արձանագրվել էին դեռևս 2023-2024 թվականների տեսչական այցերի ընթացքում։ Դրանք վերաբերում են արտադրանքի հետագծելիության համակարգին, անասնաբուժական ուղեկցող փաստաթղթերի ձևակերպմանը, մուտքային հումքի անասնաբուժասանիտարական փորձաքննությանը, ռիսկերի կառավարման համակարգերին և արտադրական վերահսկողության ծրագրերի կատարմանը։
Գերատեսչության գնահատմամբ՝ Հայաստանում մինչ այժմ չի ստեղծվել այնպիսի համակարգ, որը թույլ կտա լիարժեք հաստատել արտադրության մեջ օգտագործվող կաթի կամ կաթնամթերքի հումքի ծագումն ու անվտանգությունը։ Առանձնահատուկ մտահոգություն է առաջացնում ֆիզիկական անձանցից ձեռք բերվող կաթի վերամշակումը, քանի որ, ըստ Ռոսսելխոզնադզորի, այդ մատակարարները չեն կարող երաշխավորել հումքի անվտանգությունը։ Նշվում է նաև, որ անհրաժեշտ է բարելավել Հայաստանի լաբորատոր բազան։
Այս կապակցությամբ Ռոսսելխոզնադզորը դիմել է Հայաստանի սննդամթերքի անվտանգության տեսչական մարմնին՝ խնդրելով հուլիսի 27-ից դադարեցնել Հայաստանի բոլոր կաթնամթերք արտադրող ձեռնարկությունների արտադրանքի անասնաբուժական սերտիֆիկացումը՝ ռուսական շուկա արտահանման համար։ Միաժամանակ ՌԴ մաքսային և տարածքային կառույցներին հանձնարարական է տրվել ապահովել, որպեսզի նշված օրվանից Հայաստանից կաթնամթերքի ներմուծումը Ռուսաստան չթույլատրվի։
Հետևեք մեզ տելեգրամում
