Իրանի պաշտպանության նախարարի պաշտոնակատար, բրիգադային գեներալ Մաջիդ իբն Ռեզան Թուրքիայի պաշտպանության նախարար Յաշար Գյուլերի հետ հեռախոսազրույցում առաջարկել է տարածաշրջանի մահմեդական երկրների միջև անվտանգության համատեղ մեխանիզմ ստեղծել։ Հաղորդում է իրանական «Mehr» գործակալությունը։
Նրա խոսքով՝ վերջին պատերազմը ցույց է տվել, որ տարածաշրջանի անվտանգությունը պետք է ապահովեն հենց տարածաշրջանի երկրները։ Նա առաջարկել է ստեղծել մահմեդական երկրների անվտանգային դաշինք, որի կազմում կարող են ընդգրկվել Իրանը, Թուրքիան, Պակիստանը, Սաուդյան Արաբիան, Եգիպտոսը և այլ երկրներ։
Իրանի պաշտպանության նախարարի պաշտոնակատարը նաև հայտարարել է, որ Թեհրանը չի վստահում ԱՄՆ-ին՝ Վաշինգտոնի կողմից պայմանավորվածությունները չկատարելու պատճառով, և Իրանի զինված ուժերը պատրաստ են պատասխանել ցանկացած ագրեսիայի։
Թուրքիայի պաշտպանության նախարարն իր հերթին աջակցել է հրադադարի պայմանավորվածության լիարժեք իրականացմանն ու դիվանագիտական գործընթացի շարունակմանը։ Նա նաև հայտարարել է, որ Թուրքիան պատրաստ է ընդլայնել Իրանի հետ համագործակցությունը ահաբեկչության դեմ պայքարի, սահմանային անվտանգության և տարածաշրջանային հարցերի շուրջ։
Հետևեք մեզ տելեգրամում
