Սաուդյան Արաբիայի մայրաքաղաք Էր Ռիադում բազմոցի արտադրամասում բռնկված հրդեհի հետևանքով զոհվել է Բանգլադեշի 16 քաղաքացի։ Այս մասին, «Reuters»-ի փոխանցմամբ, հայտնել է Բանգլադեշի արտագաղթյալների բարեկեցության և արտերկրում զբաղվածության նախարարությունը՝ վկայակոչելով Սաուդյան Արաբիայի հրշեջ ծառայությանը։
Զոհվածները Սաուդյան Արաբիայում աշխատող միգրանտներ են եղել։ Նրանցից 10-ը Բանգլադեշի Նաոգաոն շրջանից էին, մյուսները՝ Նատոր և Ռաջշահի շրջաններից։
Բանգլադեշի արտաքին գործերի նախարարությունը հայտնել է, որ հետևում է իրավիճակին։ Էր Ռիադում երկրի դեսպանատան ներկայացուցիչները ժամանել են դեպքի վայր և Սաուդյան Արաբիայի համապատասխան մարմինների հետ աշխատում են զոհվածների ինքնությունը պարզելու և նրանց մարմինները հայրենիք տեղափոխելու ուղղությամբ։
Նշենք, որ Սաուդյան Արաբիան շարունակում է մնալ բանգլադեշցի աշխատանքային միգրանտների հիմնական ուղղությունը։ Երկրում բնակվում և աշխատում է Բանգլադեշի շուրջ 3,5 մլն քաղաքացի։
Հետևեք մեզ տելեգրամում
