Բաքվի բանտի մեկուսարանում գտնվող Սանկտ Պետերբուրգի Ճարտարապետաշինարարական համալսարանի 23-ամյա ուսանող Դմիտրի Ֆեոդորովը հայտնվել է ծանր հոգեբանական վիճակում։ Ռուսաստանի նախագահի գրասենյակին առընթեր Մարդու իրավունքների խորհրդի անդամ Եվա Մերկաչյովայի փոխանցմամբ՝ մոր հետ տեսակցության ժամանակ երիտասարդը չի կարողացել հիշել նրա անունը և նրան շփոթել է քրոջ հետ։ Այս մասին հայտնում է RTVI-ին:
«Տղային պետք է փրկել՝ հենց հիմա»,- հայտարարել է Մերկաչյովան: Ըստ նրա՝ երկարատև կալանքի հետևանքով Ֆեոդորովը ինքնամփոփ է դարձել, դադարել է շփվել և գրեթե չի քնում։ Հարազատներն ու իրավապաշտպանները պահանջում են փոխել նրա խափանման միջոցը, «իսկ ավելի լավ է՝ հանձնել Ռուսաստանին»։
Ֆեոդորովը 2026 թվականի հունիսին Ադրբեջանում թմրանյութերի ապօրինի շրջանառության մեղադրանքով 3-4 տարվա ազատազրկման դատապարտված ութ ռուսաստանցիներից մեկն է։ ՌԴ քաղաքացիների զանգվածային ձերբակալությունները տեղի էին ունեցել 2025 թվականի հունիս-հուլիս ամիսներին՝ Եկատերինբուրգում ադրբեջանական համայնքի ներկայացուցիչների դեմ իրականացված հետապնդումներից ու ձերբակալություններից և դրան հետևած դիվանագիտական լարվածությունից հետո։ Դատարանից ստացված տեսանյութերում ձերբակալվածների դեմքերին նկատելի էին ծեծի հետքեր։
Իրավապաշտպան Մերկաչյովան ընդգծել է, որ դատապարտված ռուսաստանցիները միմյանց հետ կապ չեն ունեցել և աշխատել են տարբեր ոլորտներում։ Սկզբնական շրջանում նրանց մեղադրել են թմրանյութերի մաքսանենգության և կազմակերպված հանցավոր խումբ ձևավորելու մեջ, սակայն հետագայում մեղադրանքը մեղմացվել է:
Հետևեք մեզ տելեգրամում
