ԱՄՆ զինված ուժերը Հորմուզի նեղուցում նավագնացության համար գաղտնի միջանցք են ստեղծել, որով օրական միլիոնավոր բարել նավթ է դուրս բերվում տարածաշրջանից: Այս մասին հայտնում է ամերիկյան Axios պարբերականը՝ հղում անելով իր աղբյուրներին:
Ըստ լրատվամիջոցի՝ արդեն մի քանի շաբաթ իրականացվող գործողության շրջանակում Օմանի ափամերձ հարավային երթուղով ամեն գիշեր 15-ից 20 տանկեր մուտք ու ելք են անում նեղուցով, և օրական մոտ 10 միլիոն բարել նավթ, որը կազմում է նախապատերազմյան ծավալի շուրջ կեսը, դուրս է բերվում հակամարտության գոտուց և մատակարարվում համաշխարհային շուկա:
Axios-ը նշում է, որ ամերիկյան զինուժը ոչ միայն ուղեկցում է նավթով բեռնված նավերը, այլև աջակցում է դատարկ նավթատարներին Արաբական ծովից մուտք գործել Պարսից ծոց, բեռնվել Պարսից ծոցի երկրների նավահանգիստներում և ապահով դուրս գալ:
«ԱՄՆ ՌՕՈւ կործանիչներն մշտական հսկողություն են իրականացնում օդում՝ նավերը պաշտպանելով իրանական թևավոր հրթիռների և ԱԹՍ-ների հարվածներից: Գործողությունը հնարավոր է դարձել ԱՄՆ Կենտրոնական հրամանատարության իրականացրած երկշաբաթյա ռազմական արշավից հետո, որը շարքից հանել է Իրանի ռադարային և ծովային դիտարկման համակարգերը»,- գրել է պարբերականը:
Ամերիկացի պաշտոնյաների փոխանցմամբ՝ Իրանի Իսլամական հեղափոխության պահապանների կորպուսը զրկվել է նեղուցի հարավային հատվածը լիարժեք վերահսկելու հնարավորությունից և նավերի ուղղությամբ հարվածներ է հասցնում գրեթե «կույր» եղանակով: «Չնայած որոշ հարձակումներին՝ ամերիկյան ուժերը հաջողությամբ խոցում են սպառնալիքները. օրինակ՝ այս շաբաթվա սկզբին խոցվել է իրանական 8 ԱԹՍ և 2 թևավոր հրթիռ»,- լրատվամիջոցին են հայտնել ԱՄՆ պաշտոնյաները:
ԱՄՆ նախագահ Դոնալդ Թրամփը Axios-ին տված հարցազրույցում հաստատել է, որ Հորմուզի նեղուցով «ահռելի քանակությամբ նավթ է դուրս գալիս»: Նա միևնույն ժամանակ ընդգծել է, որ Վաշինգտոնն այժմ բանակցություններ չի վարում Թեհրանի հետ՝ դրանք անվանելով «ժամանակի կորուստ»:
Հետևեք մեզ տելեգրամում
