Իրանի զինված ուժերը հայտարարել են, որ երկուշաբթի վաղ առավոտյան տասնյակ պայթուցիկ անօդաչու թռչող սարքերով հարված են հասցրել Արաբական Միացյալ Էմիրություններում գտնվող Ալ Մինհադ ռազմակայանին, որտեղ տեղակայված են ամերիկյան զինծառայողներ և ուղղաթիռներ։ Այս մասին հայտնել է «Reuters»-ը։
Իրանական լրատվական գործակալությունների փոխանցմամբ՝ Իրանի բանակը հայտնել է, որ հարձակման թիրախում են եղել ռազմակայանի այն հատվածները, որտեղ տեղակայված են եղել ԱՄՆ զինված ուժերի անձնակազմն ու ռազմական ուղղաթիռները։ Իրանական կողմը Ալ Մինհադը բնութագրել է որպես «օտարերկրյա ուժերի համար կարևոր լոգիստիկ և օդային փոխադրումների կենտրոն»։
Իրանի բանակի հայտարարության համաձայն՝ հարձակումը իրականացվել է ի պատասխան կիրակի օրը ԱՄՆ-ի կողմից Իրանի Լարակ կղզուն հասցված հարվածի, որի հետևանքով, իրանական կողմի պնդմամբ, սպանվել կամ վիրավորվել են Իսլամական հեղափոխության պահապանների կորպուսի զինծառայողներ և խաղաղ բնակիչներ։
Իրանական կողմը հայտարարել է, որ պատրաստվում է շարունակել պատասխան գործողությունները տարածաշրջանում տեղակայված ամերիկյան ուժերի դեմ։
Միաժամանակ, Արաբական Միացյալ Էմիրությունների պաշտպանության նախարարությունը հերքել է տեղեկությունները, թե Ալ Մինհադ ռազմակայանը հրթիռային հարձակման է ենթարկվել։ Նախարարությունը հայտարարել է, որ տարածված տեղեկությունները կեղծ են, իսկ երկրի զինված ուժերը շարունակում են մնալ բարձր պատրաստվածության վիճակում՝ հնարավոր սպառնալիքներին արձագանքելու և երկրի ինքնիշխանությունը, անվտանգությունն ու կայունությունը պաշտպանելու համար։
Հետևեք մեզ տելեգրամում
