ՌԴ նախագահ Վլադիմիր Պուտինը հայտարարել է, որ Ուկրաինայում պատերազմը դադարեցնելու շուրջ համաձայնության հասնելու հնարավորություն կա։ Նրա խոսքով՝ խաղաղ կարգավորմանը պատրաստ են աջակցել մի շարք երկրներ, այդ թվում՝ ԱՄՆ-ն ու Չինաստանը։ Այս մասին հայտնում է Reuters-ը:
«Իմ կարծիքով՝ հնարավորություն կա»,- ասել է Պուտինը։ Միաժամանակ նա նշել է, որ վերջնական լուծումը պետք է գտնեն հակամարտության անմիջական կողմերը՝ Ռուսաստանն ու Ուկրաինան։
Պուտինը նաև հայտնել է, որ Ռուսաստանի և Ուկրաինայի միջև շփումները շարունակվում են՝ հիմնականում հատուկ ծառայությունների խողովակներով։ Նրա խոսքով՝ դեռևս դժվար է գնահատել, թե որքանով են այդ շփումները նպաստում խաղաղության համաձայնագրի ձեռքբերմանը։
Ուկրաինայի նախագահ Վոլոդիմիր Զելենսկին իր հերթին հայտնել է, որ առաջիկա օրերին ԱՄՆ նախագահի ներկայացուցիչների Կիև այց է սպասվում։ Նրա խոսքով՝ ամերիկացի բանակցողները հանդիպումներ կունենան ինչպես Մոսկվայում, այնպես էլ Կիևում։
ԱՄՆ միջնորդությամբ կողմերի միջև վերջին ուղիղ բանակցություններն անցկացվել են փետրվարին։ Դրանից հետո Ռուսաստանն ու Ուկրաինան ակտիվացրել են միմյանց տարածքների ուղղությամբ իրականացվող հարվածները։
Հետևեք մեզ տելեգրամում
