ԱՄՆ-ը նախատեսում է Գրենլանդիայի երկու հենակետերում ռազմական ներկայություն հաստատել՝ Դանիայի և Գրենլանդիայի հետ նոր համաձայնագրի շրջանակում։ Այս մասին հայտնում է BBC-ն։
Նախատեսվում է վերաբացել Գրենլանդիայի հարավում գտնվող նախկին ամերիկյան «Bluie West One» բազան և ԱՄՆ-ի ռազմական ներկայություն հաստատել արևելյան ափի «Mestersvig» հենակետում։
«Bluie West One»-ը ԱՄՆ-ն օգտագործել է Սառը պատերազմի տարիներին, սակայն բազան փակվել է 1950-ականներին։ «Mestersvig»-ը ներկայում օգտագործվում է Դանիայի հատուկ նշանակության ուժերի կողմից, որոնք շների սահնակներով պարեկություն են իրականացնում Գրենլանդիայի հյուսիսարևելյան հատվածում։
ԱՄՆ-ի, Դանիայի և Գրենլանդիայի միջև համաձայնագիրը նախատեսվում է ստորագրել ՄԱԿ-ի Գլխավոր ասամբլեայի շրջանակում։ Փաստաթղթի ամբողջական տեքստը դեռ հրապարակված չէ, իսկ BBC-ի աղբյուրների համաձայն՝ դրա որոշ դրույթներ մինչև ստորագրումը կարող են փոփոխվել։
Դանիայի իշխանությունների խոսքով՝ համաձայնագիրը Արկտիկայի անվտանգության հարցը կդիտարկի նաև ՆԱՏՕ-ի շրջանակում՝ այն չսահմանափակելով ԱՄՆ-ի և Դանիայի պատասխանատվությամբ։
Բանակցությունները սկսվել են այն բանից հետո, երբ ԱՄՆ նախագահ Դոնալդ Թրամփը հայտարարել էր Գրենլանդիան ԱՄՆ-ի վերահսկողության տակ վերցնելու ցանկության մասին և չէր բացառել այդ նպատակով ռազմական կամ տնտեսական ճնշման կիրառումը։
Հետևեք մեզ տելեգրամում
