Սաուդյան Արաբիան հերքել է տեղեկությունները, թե իր ներկայացուցիչը մասնակցել է Իսրայելի վարչապետ Բենիամին Նեթանյահուի և ԱՄԷ նախագահ Մոհամմադ բին Զայեդ Ալ Նահյանի՝ Աբու Դաբիում կայացած հանդիպմանը և ասել, որ նման տեղեկությունները չեն համապատասխանում իրականությանը։ Այս մասին հայտնել է «Arab News»-ը։
Տեղեկությունը նախ հրապարակել էր իսրայելցի լրագրող Դրոր Բալազադան, որը սոցցանցերում գրել էր, թե Նեթանյահուի և Ալ Նահյանի հանդիպումից հետո տեղի է ունեցել ընդլայնված հանդիպում՝ Սաուդյան Արաբիայի ներկայացուցիչների մասնակցությամբ։ Նրա հաղորդմամբ՝ քննարկվել են անվտանգության համագործակցությունը, Իրանը, հութիները և տարածաշրջանային պաշտպանության համակարգերը։
Սաուդյան աղբյուրը «Arab News»-ին հայտնել է, որ ոչ միայն Սաուդյան Արաբիայի ներկայացուցիչ չի մասնակցել այդ հանդիպմանը, այլև այլ երկրների մասնակցությամբ հանդիպումներ չեն եղել։ Հանդիպմանը Հորդանանից պաշտոնյաների մասնակցությունը ևս հերքվել է։ Նրա խոսքով՝ իսրայելական մամուլում տարածվող տեղեկությունները կապված են Նեթանյահուի ընտրական շահերի հետ։
Հիշեցնենք, որ Նեթանյահուն Աբու Դաբի էր այցելել կիրակի օրը և հանդիպել ԱՄԷ նախագահի հետ։ ԱՄԷ-ի պաշտոնական լրատվական գործակալության հաղորդմամբ՝ կողմերը քննարկել են երկկողմ հարաբերություններն ու դրանք զարգացնելու ուղիները։ Միաժամանակ, երեք բարձրաստիճան իսրայելցի պաշտոնյաներ «Reuters»-ին հայտնել են, որ հանդիպումը տևել է մոտ վեց ժամ, իսկ քննարկումների հիմնական թեման Իրանի հարցն է եղել։
Հետևեք մեզ տելեգրամում
