Վրաստանի խորհրդարանը այսօրվա արտահերթ նիստում երրորդ ընթերցմամբ 117 ձայնով հաստատել է ընտրական համակարգի փոփոխությունների սահմանադրական բարեփոխումների փաթեթը: Փոփոխություններին դեմ է քվեարկել 3 պատգամավոր։ Քվեարկությանը չեն մասնակցել ընդիմադիր «Միացյալ ազգային շարժում» և «Եվրոպական Վրաստան» կուսակցությունները:
Սահմանադրական բարեփոխումների նախագիծը նախատեսում է, որ 2020 թվականի խորհրդարանական ընտրությունները կանցկացվեն խառը համակարգով – խորհրդարանում կընտրվի 120 անդամ համամասնական և 30 անդամ՝ մեծամասնական ընտրական համակարգով (գործող 77/73-ի փոխարեն):
Փոփոխություններով սահմանվում է, որ համամասնական ընտրությունների ընտրաշեմը կկազմի 1%, իսկ դաշինքների պարագայում նույն մեկական տոկոսը ամեն մի անդամ կուսակցության հաշվարկով:
Նախագծով նախատեսվում է նաև այսպես կոչված 40% փականը – այն կուսակցությունը, որը չկարողանա ստանալ 40%-ից ավել քվե, չի կարողանա ձևավորել խորհրդարական մեծամասնություն, կամ կառավարություն:
Օրինագծով նաև սահմանվում է այն, որ մինչև 2024 թվականի արտահերթ ընտրությունների անցկացման դեպքում, կգործի ներկայացված սահմանադրական օրինագծով սահմանված ժամանակավոր ընտրական համակարգը:
Հետևեք մեզ տելեգրամում
