Ամերիկայի Միացյալ Նահանգների պետքարտուղարությունը հայտարարություն է տարածել, որում կոչ է արել պահպանել հրադադարը հայ-ադրբեջանական սահմանին։ ԱՄՆ պետքարտուղարության հայտարարությունը՝ ստորև․
«Միացյալ Նահանգները խստորեն դատապարտում է բռնությունը հայ-ադրբեջանական սահմանին։ Կողմերին կոչ ենք անում անհապաղ դադարեցնել ուժի կիրառումը, օգտագործել միմյանց միջև առկա ուղիղ հաղորդակցության կապերը և խստորեն հետևել հրադադարի ռեժիմի պահպանմանը։
Լինելով ԵԱՀԿ Մինսկի խմբի համանախագահող երկիր՝ ԱՄՆ-ն հհանձնառու է օգնել կողմերին Լեռնային Ղարաբաղի հակամարտության խաղաղ կարգավորմանը հասնելու հարցում։ Մենք շարունակելու ակտիվորեն ներգրավված լինել այդ նպատակին հասնելու ջանքերում։
ԱՄՆ-ն միանում է Մինսկի խմբի համանախագահներին՝ կողմերին կոչ անելով որքան հնարավոր է շուտ վերսկսել բովանդակային բանակցությունները և ընդգծում է ԵԱՀԿ դիտորդների՝ տարածաշրջան վերադարձի կարևորությունը, երբ թույլ կտան հանգամանքները»։
Հիշեցնենք, որ Ադրբեջանի զինված ուժերի զինծառայողները հուլիսի 12-ին՝ ժամը 12:30-ի սահմաններում, ՈՒԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձ էին կատարել, սակայն համապատասխան զգուշացումից հետո թողնելով ՈՒԱԶ մակնիշի ավտոմեքենան, վերադարձել էին իրենց դիրք: Այնուհետև Ադրբեջանի զինված ուժերի զինծառայողները կրկնել էին հայկական զինված ուժերի սահմանային դիրքը գրավելու փորձը՝ կիրառելով հրետանային կրակ, սակայն ճնշվել էին հայկական կողմից և, կորուստներ կրելով, հետ շպրտվել։ Հրետակոծությունը ադրբեջանական կողմից շարունակվել է նաև հուլիսի 13-ի առավոտյան:13-ի ցերեկային ժամերին Ադրբեջանի ԶՈՒ-ն 82 և 120 մմ տրամաչափի ականանետերից հրետանակոծել է հայկական Չինարի գյուղը։
Ադրբեջանի ՊՆ-ն պաշտոնապես հայտարարել է 4 զոհի մասին, մինչդեռ ադրբեջանական սոցցանցերում խոսվում է առնվազն 17 զոհի մասին։ Հայկական կողմից կորուստներ չկան:
Հետևեք մեզ տելեգրամում
