Սեպտեմբեր 17-ին Ֆրանսիայում կայացել է հայ ցուցարարների վրա հարձակված թուրքերի գործով դատական 1-ին նիստը:
Ֆրանսիայի Դեսին քաղաքում հուլիսի 24-ին թուրքական ծայրահեղական «Գորշ գայլեր» խմբավորման տասնյակ զինված երիտասարդներ հարձակվել էին հայ խաղաղ ցուցարարների վրա և նյութական հսկայական վնաս պատճառել: Ձերբակալվել էին կազմակերպիչը՝ Ահմեթ Չեթինը, և կազմակերպության ևս 4 անդամ։ Նրանք մեղադրվում են հայերի դեմ ատելություն հրահրելու մեջ:
Ֆրանսիայի Բուրկ ան Բրեսի դատախազության Չեթինի համար պահանջել է 6 ամսվա պայմանական պատիժ, 5 տարով զրկել ընտրվելու իրավունքից և 2․000 եվրո տուգանք։ Փաստաբանը նշել է, որ Չեթինն ընդունել է իր սխալն ու դադարեցրել է քաղաքական բոլոր գործունեությունները։ Դատավճիռը հրապարակվելու է նոյեմբերի 5-ին։
Հիշեցնենք, որ մոտ 500 ֆրանսահայեր հուլիսի 24-ին խաղաղ բողոքի ցույց էին իրականացնում ընդդեմ Ադրբեջանի սադրանքների։ Թուրքական աջակողմյան, ծայրահեղական «Գորշ գայլեր» խմբավորման անդամները թուրքական դրոշներով, երկաթե ձողերով և դանակներով հարձակվել էին խաղաղ հայ ցուցարարների վրա։ Ֆրանսիայի ոստիկանության միջամտության շնորհիվ հարձակումը կանխվել է:
Հետևեք մեզ տելեգրամում
