Այս պահի դրությամբ արցախաադրբեջանական սահմանի ողջ երկայնքով շարունակվում են մարտական գործողությունները տարբեր ինտենսիվությամբ։ Նորից կիզակետում շարունակում են մնալ հյուսիսային ու հարավային ուղղությունները։ Այս մասին լրագրողների հետ ճեպազրույցում ասաց ՊՆ ներկայացուցիչ Արծրուն Հովհաննիսյանը։
«Այսօր առավոտյան մենք արդեն նշել ենք, որ Ադրբեջանը հրետանու միջոցների մեծաքանակ կիրառությամբ, այդ թվում՝ նաև հրանետային միջոցների կիրառմամբ նոր հարձակումներ է սկսել, որոնք հայկական զինված ուժերը հաջողությամբ հետ են մղում՝ հակառակորդին պատճառելով զգալի կորուստներ։ Մասնավորապես, րոպեներ առաջ Արցախի ՊՆ-ն հրապարակել է տեսանյութերով հիմնավորված տեղեկություն, որ հարավային ուղղությամբ Ադրբեջանի ԶՈւ բավական լայնածավալ հարձակվողական գործողություններ հետ են մղվել տանկային ստորաբաժանումներով։ Եվ այդ ընթացքում ադրբեջանական զինված ուժերը կորցրել են ևս 10-11 միավոր զրահատեխնիկա, հիմնականում տանկեր։ Հետ են շպրտվել ելման դիրքեր, և այդ ուղղությամբ այս պահին համեմատաբար հանգիստ է, ընթանում են թեթև մարտեր»,- ասաց նա՝ հավելելով, որ այլ ուղղություններով մարտերը շարունակվում են։
Ըստ Հովհաննիսյանի՝ հրետանու կիրառումը բավական մեծ էր օրվա ընթացքում, հրետակածվել են նաև հյուսիսային հատվածի հայկական բնակավայրերը, մասնավորապես, Մարտակերտը։ Մարտակերտի հարակից բնակավայրերում նաև կրակի տակ են ընկել լրատվամիջոցների ներկայացուցիչները։
«Հակառակորդի կորուստները ճշտվում են, լրացուցիչ կհայտնենք։ Այլ վիրավորներ են տեղափոխվել ՀՀ հիվանդանոցներ և հոսպիտալներ։ Վիրավորների մեծ մասը ունեն թեթև վիրավորումներ»,- հավելեց նա։
Հետևեք մեզ տելեգրամում
