Իրանում Հայաստանի արտակարգ և լիազոր դեսպան Արտաշես Թումանյանը ողջունել է երկու երկրների միջև ուղիղ ապրանքաշրջանառության մեխանիզմ մշակելու իրանական կողմի առաջարկը:
«Հայաստանի կառավարությունը գտնում է, որ Իրանի հետ ներկայիս գործնական հարաբերություններն, առաջին հերթին, պետք է պահպանվեն, իսկ հետո արդեն զարգանան», – հայտարարել է Թումանյանը Թեհրանի առեւտրի, արդյունաբերության, հանքերի եւ գյուղատնտեսության հարցերի պալատի ղեկավար Մասուդ Հանսարիի հետ հանդիպման ժամանակ:
Թումանյանը նշել է, որ ՀՀ դեսպանությունը պատրաստ է աջակցություն ցուցաբերել մասնավոր հատվածի իրանցի գործարարներին՝ հայկական շուկա մուտք գործելու համար:
Թեհրանի առեւտրի, արդյունաբերության, հանքերի եւ գյուղատնտեսության հարցերի պալատի ղեկավարն իր հերթին նշել է, որ ներկայում Իրանն ու Չինաստանն անցել են ուղղակի ապրանքափոխանակման՝ շրջանցելով Իրանի նկատմամբ ԱՄՆ միակողմանի պատժամիջոցները, ինչը հանգեցրել է բանկային գործարքների նվազեցմանը: Հանսարին հույս է հայտնել, որ Իրանն ու Հայաստանը նույնպես կարող են անցնել ուղղակի ապրանքափոխանակման։
Հետևեք մեզ տելեգրամում
