Լիբանանի ՀՅԴ կենտրոնական կոմիտեի անդամ, հայ պատգամավոր Հակոբ Բագրատունին այցելել է Լիբանանի Հանրապետության նախագահին, բանակի հրամանատարին և Ռուսաստանի դեսպանին, որի ընթացքում քննարկել են կառավարության կազմի հարցը, Լիբանանում թուրքական գործոնի ակտիվացումը և թուրք-ադրբեջանական հարձակումն Արցախի վրա:
Նախագահ Միշել Աունի հետ հանիդպմանը քննարկել են կառավարության կազմությանն առնչվող հարցեր: Հանրապետության նախագահը ներկայացրել է ներկա փուլի խնդիրները և հույս հայտնել, որ կարճ ժամանակում հնարավոր կլինի ձևավորել կառավարություն: Իր հերթին Բագրատունի ասել է, որ հայկական պատգամավորական դաշինքը և ՀՅԴ-ն իրենց միջոցները կներդնեն կառավարության կազմությունը դյուրացնելու համար, որն անհետաձգելի պահանջ է քաղաքացիների համար:
Բանակի հրամանատար Ժոզեֆ Աունի հետ հանդիմանը, որի ներկա էր նաև հայկական պատգամավորական դաշինքից Հակոբ Թերզյանը, քննարկվել են երկրի անվտանգությանն առնչվող հարցեր և բանակի կարևոր դերակատարությունը: Բագրատունի բանակի հրամանատարությանն է ներկայացրել Լիբանանում թուրքական գործոնի աշխուժացումը և այդ ուղղությամբ պետական, զինվորական ծառայությունների աչալուրջ հսկողության կարևորությւնը:
Պատգամավոր Բագրատունին հանդիպում է ունեցել նաև Լիբանանում Ռուսաստանի նոր դեսպան Ալեքսանդր Ռուդակովի հետ: ՀՅԴ Լիբանանի կենտրոնական կոմիտեի ներկայացուցիչը դեսպան Ռուդակովին ներկայացրել է Լիբանանի հայ համայնքի դերակատարությունը և ՀՅ Դաշնակցության լիբանանյան քաղաքականության ուղղվածությունը:
Քննարկման նյութ է դարձել թուրք-ադրբեջանական հարձակումը Արցախի վրա: Ռուսաստանի դեսպանը ներկայացրել է իր երկրին դիրքորոշումն այս պատերազմի վերաբերյալ: Բագրատունին անհրաժեշտ համարեց Ռուսաստանի արագ միջամտությունը հայության դեմ սանձազերծված այս պատերազմի դադարեցման համար` նկատի ունենալով Արցախի ժողովրդի կամքը և թուրք-ադրբեջանական ցեղասպան վարքագիծին վտանգավոր բնույթը:
Հետևեք մեզ տելեգրամում
