Թուրքիայի բանակը կորուստներ ունի

Թուրքիայի հարավարևելյան Շըրնաք նահանգի Իդիլ շրջանում  ինքնաշեն ռումբի պայթեման հետևանքով 2 թուրք զինվոր է սպանվել, ևս 7-ը վիրավորվել են։

Ըստ թուրքական աղբյուրների՝ ինքնաշեն պայթուցիկը տեղադրել էին «Քուրդիստանի բանվորական կուսակցության» (PKK) զինյալները։  

Պայթյունը տեղի է ունեցել այն պահին, երբ թուրք զինվորները տարածքում իրականացրել են ականազերծման և որոնողական աշխատանքներ։

Հիշեցնենք, որ PKK-ն Թուրքիայում համարվում է ահաբեկչական կազմակերպություն։ Քուրդ զինյալների դեմ գործողությունները ընթանում են ինչպես Թուրքիայի ներսում, այնպես էլ երկրից դուրս։ Ըստ թուրքական կողմի՝ PKK-ի գլխավոր ռազմաբազան գտնվում է Հյուսիսային Իրաքի Քանդիլ շրջանում, որտեղ Թուրքիայի օդուժը հաճախ հրթիռակոծություններ է իրականացնում։