ՄԱԿ-ի գլխավոր քարտուղար Անտոնիու Գուտերեշը կոչ է արել անհապաղ դադարեցնել ռազմական գործողությունները Սիրիայում։ Գլխավոր քարտուղարի պաշտոնական ներկայացուցիչ Ստեֆան Դյուժարիկի կողմից հրապարակված հայտարարության մեջ մտահոգություն է արտահայտվել Սիրիայում կրկին մեծացող լարվածության առթիվ։
«Գլխավոր քարտուղարը խորապես մտահոգված է Սիրիայի հյուսիս –արևմուտքում ռազմական ագրեսիայի սաստկացմամբ և կոչ է անում անմիջապես դադարեցնել ռազմական գործողությունները։ Գլխավոր քարտուղարը բոլոր կողմերին հիշեցնում է քաղաքացիական բնակչությանը պաշտպանելու և նրանց ազատ տեղաշարժն ապահովելու իրենց պարտավորության մասին»,- հայտարարել է Դյուժարիկը։
ՄԱԿ-ում մասնավորապես մտահոգված են ռազմական գործողությունների ծավալով և այն հանգամանքով, որ երկրի հյուսիսային հատվածը լքել ջանացող քաղաքացիական անձանց երթուղիները ևս թիրախավորվում են։
Դյուժարիկի հայտարարության մեջ արձանագրվել է, որ վերջին լարվածությունների պատճառով տասնյակ քաղաքացիական անձինք են զոհվել, տեղահանվել է շուրջ 80․000 բնակիչ, որից 30․000-ը՝ միայն վերջին շաբաթվա ընթացքում։
Հիշեցնենք, որ սիրիայում ռազմական գործողությունները սկիզբ են առել 2011թ․։ 2017թ․ վերջին հայտարարվեց Սիրիայի և Իրաքի՝ «Իսլամական պետություն» ահաբեկչական խմբավորումից ազատագրման մասին։ Բայց երկրի տարբեր շրջաններում ահաբեկիչների դեմ պայքարը դեռ շարունակվում է։
Հետևեք մեզ տելեգրամում
