ՌԴ նախագահ Վլադիմիր Պուտինը ամենամյա «Ուղիղ գիծ» հարցուպատասխանի ժամանակ հայտարարել է, որ ոչ ոք շահագրգռված չէ Ղարաբաղում ճգնաժամի զարգացմամբ՝ ո՛չ Հայաստանը, ո՛չ Ադրբեջանը։
Հարցին, թե արդյոք Մոսկվան կարող է երաշխավորել Լեռնային Ղարաբաղի բնակչության անվտանգությունը՝ Պուտինը նշել է.
«Ռուսաստանը մեծ դեր է խաղացել այդ լուրջ ճգնաժամի կարգավորման հարցում, ոչ ոք շահագրգռված չէ իրավիճակի սրմամբ՝ ոչ Հայաստանը, ոչ Ադրբեջանը և առավել ևս Լեռնային Ղարաբաղի բնակիչները: Հարցի մյուս կողմն այն է, որ եթե խաղաղ, բարեկամաբար ապրեն, ապա մենք պայմաններ կստեղծենք մարդկանց կյանքի բարելավման համար ոչ միայն անվտանգային ոլորտում: Ապրել այն մտավախությամբ, որ կվերսկսվի զինված հակամարտությունը, անհնար է: Դա հասկանում են ինչպես Հայաստանի, այնպես էլ Ադրբեջանի ղեկավարները»:
Ռուսաստանի նախագահի խոսքով՝ Հայաստանի և Ադրբեջանի միջև բազմաթիվ խնդիրներ են կուտակվել, որոնք վերաբերում են ենթակառուցվածքների վերականգնմանը, սահմանագծմանը, համապատասխան աշխատանքներ պետք է իրականացվեն հայ-ադրբեջանական սահմանին, հատկապես այն վայրերում, որտեղ պետական սահմաններ երբեք էլ չեն եղել, այնտեղ եղել են միայն ադմինիստրատիվ սահմաններ խորհրդային պետությունների միջև:
«Մենք հիմա գտնվում ենք այդ աշխատանքի գործընթացում, ստեղծել ենք հատուկ եռակողմ խումբ` Հայաստան, Ռուսաստան ու Ադրբեջան, և կանենք ամեն ինչ, որպեսզի վերականգնենք տարածաշրջանում նորմալ հարաբերությունները»,-ասել է Պուտինը:
Հետևեք մեզ տելեգրամում
