Սիրիայի ընդդիմության և Թուրքիայի պատվիրակությունը ժամանել են Ղազախստանի մայրաքաղաք Նուր-Սուլթան՝ մասնակցելու Աստանայի ձևաչափով Սիրիայի հարցով 16-րդ միջազգային հանդիպմանը: Այս մասին լրագրողներին հայտնել է Ղազախստանի ԱԳՆ պաշտոնական ներկայացուցիչ Այբեկ Սմադիյարովը:
«Ղազախստանի մայրաքաղաք են ժամանել Սիրիայի ընդդիմության ներկայացուցիչները՝ Ահմեդ Տոմայի գլխավորությամբ և Թուրքիայի պատվիրակությունը, որը ներկայացնում է Թուրքիայի ԱԳՆ երկկողմ քաղաքական հարաբերությունների հարցով գլխավոր տնօրեն Սելջուկ Ունալը»,-ասել է Սմադիյարովը:
Նրա խոսքով, Նուր-Սուլթանում սպասում են նաև Սիրիայի ԱԳ փոխնախարար Այման Սուսանին, Սիրիայի հարցով ՄԱԿ գլխավոր քարտուղարի հատուկ դեսպան Գեյր Պեդերսոնին և Սիրիայի հարցով ՌԴ նախագահի հատուկ ներկայացուցիչ Ալեքսանդր Լավրենտինևին: Իրանի ներկայացուցիչը՝ ԱԳՆ ավագ խորհրդական Ալի Ասղար Հաջին, կժամանի հուլիսի 8-ին:
Հուլիսի 7-8-ը Նուր-Սուլթանում տեղի կունենա Սիրիայի հարցով 16-րդ միջազգային բարձր մակարդակի հանդիպումը Աստանայի ձևաչափով՝ երաշխավոր երկրների (Իրան, Ռուսաստան, Թուրքիա) և Սիրիայի կառավարության ու ընդդիմության մասնակցությամբ: Որպես դիտորդ՝ համաժողովին մասնակցում են ՄԱԿ, Հորդանանի, Լիբանանի և Իրաքի ներկայացուցիչները: Բանակցողները կքննարկեն իրավիճակը Սիրիայում, միջազգային մարդասիրական օգնության տրամադրումը, Ժնևում Սիրիայի սահմանադրական կոմիտեի աշխատանքի վերսկսման հեռանկարները, վստահության ամրապնդման միջոցառումները, ներառյալ գերիների փոխանակումը, պատանդների ազատումը և անհայտ կորածների որոնումը:
Հետևեք մեզ տելեգրամում
