Իրաքի «Ալ–Ֆաթհ» դաշինքը, որ գլխավորում է երկրի նախկին տրանսպորտի նախարար Հադի ալ Ամիրին, ԱՄՆ-ի իրականացրած հարվածներից հետո կոչ է արել Իրաքի խորհրդարանին՝ որոշում կայացնել բոլոր օտարերկրյա ուժերը անհապաղ երկրից հեռացնելու մասին։
Ալ Ամիրին նաև շիա աշխարհազորայինների խոշորագույն «Ալ Հաշդ աշ Շաաբի» ջոկատի հրամանատարն է: Ավելի վաղ աշխարհազորը հայտնել էր, որ ԱՄՆ-ի հարվածների հետևանքով Իրաքում 25 մարդ է զոհվել, 51-ը՝ վիրավորվել։
«Մենք «Ալ Ֆաթհ» դաշինքում վճռականորեն դատապարտում ենք ազգային ինքնիշխանության նկատմամբ այս բաց հարձակումը և կոչ ենք անում ազգային ուժերին և քաղաքական դաշինքներին Ներկայացուցիչների խորհրդում անհապաղ և համարձակ որոշում կայացնել՝ կառավարությունից պահանջել դուրս բերել բոլոր օտարերկրյա ուժերն Իրաքի տարածքից», – ասված է փաստաթղթում:
Ավելի վաղ Պենտագոնում հայտարարել էին, որ ԱՄՆ-ն հարվածներ է հասցրել Իրաքում և Սիրիայում «Քատաիբ Հեզբոլլահ» շարժման հինգ օբյեկտների ուղղությամբ՝ ի պատասխան «իրաքյան բազաների վրա կրկնվող հարձակումների»:
Ռազմական գերատեսչությունում պարզաբանել են, որ այդ գործողությունները ձեռնարկվել են ի պատասխան Քիրքուքի մոտակայքում իրաքյան բազայի վրա շարժման գրոհների, որոնց հետևանքով զոհվել է ԱՄՆ մեկ քաղաքացի և վիրավորվել չորսը:
Պենտագոնում նաև նշել են, որ այդ հարվածները նպատակ ունեն նվազեցնել կոալիցիայի ուժերի դեմ «ապագայում հարձակումներ» իրականացնելու խմբավորման հնարավորությունները: ԱՄՆ-ն Իրանին մեղադրում է «Հըզբոլլահին» հովանավորելու համար:
Հետևեք մեզ տելեգրամում
