«Քրդստանի համայնքների միությունը» (KCK-ՔՀՄ), որը «Քրդստանի բանվորական կուսակցությունը» (PKK-ՔԲԿ) համակարգող մարմինն է, հերքել է Թուրքիայում մոլեգնող անտառային հրդեհների բռնկման հետ կապ ունենալու մասին լուրերը:
«Քրդստանի համայնքների միության» գործադիր խորհրդի համանախագահությունը անտառները վառելու մեջ ՔԲԿ-ի դեմ ուղղված մեղադրանքները որակել է կեղծիք, սադրանք և հիբրիդային պատերազմի դրսևորում:
Հայտարարության մեջ ուշադրություն է հրավիրվել այն հանգամանքի վրա, որ ՔԲԿ-ին թիրախավորող լուրերի տարածումը քրդերի վրա հարձակումների է հանգեցրել:
Ըստ քրդական կազմակերպության դիտարկման՝ նման լուրերը տարածում են ռազմական հատուկ ստորաբաժանումները, որոնք պայքար են մղում քրդերի ու ժողովրդավար ուժերի դեմ, և որոնց նպատակն է Թուրքիայում քրդերի դեմ հարձակումներ հրահրել:
Անտառները հրդեհելու համար ՔԲԿ-ին մեղադրելու մյուս պատճառը, ըստ քրդական կառույցի, իշխող «Ժողովուրդ» դաշինքի վարկանիշի և հանրային աջակցության նվազումն է: Այդ պատճառով «Ժողովուրդ» դաշինքը իշխանությունը պահելու միակ հնարավորությունը տեսնում է հասարակությանը բևեռացնելու, քրդերի դեմ թշնամանք և պատերազմ հրահրելու մեջ:
Հայտարարության մեջ մատնանշվել է նաև Թուրքիայի իշխող վերնախավի շքեղ ծախսերը սեփական հարմարավետության համար և անտարբերությունը նման աղետներից ապահովագրվելու նպատակով տեխնիկական հագեցվածությունն ապահովելու համար:
Հետևեք մեզ տելեգրամում
