Իրանի խորհրդարանի նախագահ Մոհամմադ Բաղեր Ղալիբաֆն ընդունել է Ադրբեջանի մեջլիսի նախագահ Սահիբա Գաֆարովային: Հանդիպմանը Ղալիբաֆը նշել է, որ Ադրբեջանն իր բարիդրացիականության և իսլամի շնորհիվ կարևոր տեղ ունի Իրանի արտաքին քաղաքականությունում: Ղալիբաֆը կարևորել է երկկողմ հարաբերությունների զարգացման հարցում միջխորհրդարանական կապերի ընդլայնումը:
Անդրադառնալով Արցախյան հակամարտությանը՝ Ղալիբաֆը նշել է, որ հակամարտությունը ոչ միայն մարդկային ու նյութական կորուստներ է պատճառել հակամարտող կողմերին, այլև հետաձգել է տարածաշրջանի աճն ու զարգացումը: Իրանի խորհրդարանի նախագահը հիշեցրել է հակամարտության վերաբերյալ Իրանի հոգևոր առաջնորդ այաթոլլահ Խամենեինի խոսքերը, ապա հավելել, որ Իրանը դեմ է ցանկացած տարածքային փոփոխության, որը վտանգում է անկախ երկրի տարածքային ամբողջականությունը:
Հանդիպման ընթացքում անդրադարձ է եղել երկկողմ տնտեսական հարաբերություններին: Այդ համատեքստում Ղալիբաֆը նշել է, որ կան տնտեսական համատեղ բազում նախագծեր, այդ թվում՝ Հյուսիս-Հարավ միջանցքի, երկաթուղու, էներգետիկայի ոլորտներում, որոնք պետք է հնարավորինս շուտ ավարտին հասցնել, որպեսզի երկկողմ առևտրային հարաբերությունները զարգանան:
Հետևեք մեզ տելեգրամում
