Իսրայելի ԱԳ նախարար Յաիր Լապիդը սեպտեմբերի 30-ին մեկնելու է Բահրեյն՝ մասնակցելու Մանամայում Իսրայելի դեսպանատան բացման արարողությանը: Այս մասին տեղեկացնում է Իսրայելի արտաքին գործերի նախարարությունը:
Համաձայն աղբյուրի՝ Բահրեյնի մայրաքաղաք Մանամայում հանդիպելու են Բահրեյնի արտգործնախարար Աբդուլլատիֆ բըն Ռաշիդ Ալ-Զայանին և Իսրայելի ԱԳ ղեկավար Լապիդը: Նրանք մասնակցելու են Մանամայում Իսրայելի դեսպանատան բացման արարողությանը, ինչպես նաև ստորագրելու են երկկողմ մի շարք համաձայնագրեր:
Լապիդի այցը Բահրեյն առաջին պաշտոնական այցն է, ինչ երկու պետությունների միջև հաստատվել են դիվանագիտական հարաբերություններ:
Ավելի վաղ Նյու Յորքում ՄԱԿ Գլխավոր ասամբլեայի 76-րդ նստաշրջանի շրջանակներում կայացել էր Իսրայելի վարչապետ Նաֆթալի Բեննեթի հանդիպումը Բահրեյնի արտգործնախարարի հետ: Իսրայելի վարչապետը ցանկություն է հայտնել մոտ ապագայում հանդիպել Բահրեյնի թագավոր Համադ բըն Իսա Ալ Խալիֆայի հետ:
Նշենք, որ 2020թ.-ին ԱՄՆ միջնորդությամբ ԱՄԷ-ն, Բահրեյնը, ապա Մարոկկոն կարգավորել են հարաբերությունները Իսրայելի հետ:
Հետևեք մեզ տելեգրամում
