Վրաստանում տեղական ինքնակառավարման մարմինների ընտրությունների երկրորդ փուլը կկայանա հոկտեմբերի 30-ին: Այդ մասին հոկտեմբերի 3-ին կայացած ճեպազրույցի ժամանակ հայտնել է «Վրացական երազանք» կուսակցության նախագահ Իրակլի Կոբախիձեն:
Ըստ նախնական արդյունքների, որոնք հրապարակել է Վրաստանի Կենտրոնական ընտրական հանձնաժողովը հոկտեմբերի 3-ի առավոտյան՝ իշխող «Վրացական երազանք» կուսակցությունը ստացել է 48,56 տոկոս ձայն և մեծ տարբերությամբ հաղթում է տեղական ինքնակառավարման մարմինների ընտրություններում, որոնք անցկացվել են հոկտեմբերի 2-ին։
Երկրի գլխավոր ընդդիմադիր կուսակցությունը՝ «Միասնական ազգային շարժումը», 32,32 տոկոս ձայն է հավաքել։ Երրորդ տեղում է նախկին վարչապետ Գիորգի Գախարիայի «Հանուն Վրաստանի» կուսակցությունը՝ 6,87 տոկոս ձայնով։
Քաղաքապետերի ընտրությունների երկրորդ փուլը տեղի կունենա երկրի 20 քաղաքում, այդ թվում՝ Թբիլիսիում, որտեղ ոչ մի թեկնածու չի կարողացել հավաքել ձայների 50 տոկոսից ավելին:
Վրաստանի Ընտրական օրենսգրքի համաձայն՝ երկրորդ փուլն անցկացվում է տեղական ինքնակառավարման մարմինների ընտրություններից հետո չորրորդ շաբաթ օրը և նշանակվում ԿԸՀ-ի կողմից ՝ առաջին փուլի արդյունքների ամփոփման հետ միասին:
ԿԸՀ-ի նախնական տվյալներով՝ «Վրացական երազանքի» թեկնածուները կշահեն 64 մունիցիպալ կազմավորումներից 44-ում:
Հետևեք մեզ տելեգրամում
