Թեհրանում կայացել է Իրանի ու Հայաստանի արտգործնախարարների համատեղ մամուլի ասուլիսը: Իրանի ԱԳ նախարար Ամիր Աբդոլլահիանը հայտնել է, որ Հայաստանի արտգործնախարարի հետ լավ քննարկում են ունեցել՝ ընդգծել է, որ այս հանդիպումը 20 օրվա ընթացքում արդեն 3-րդն է Դուշանբեի, Նյու Յորքի հանդիպումներից հետո:
Իրան-Հայաստան հարաբերությունները կառուցողական և զարգացող որակելով՝ Աբդոլլահիանը տեղեկացրել է, որ հանդիպման ընթացքում պայմանավորվել են, որ քաղաքական հարաբերություններից բացի տնտեսության, զբոսաշրջության, առևտրի ոլորտներում ևս կընդլայնեն համագործակցությունը:
Իրանի ԱԳ նախարարը, խոսելով Հայաստան-Իրան տարանցիկ ուղիների մասին, նշել է. «Հայաստանի տարանցիկ ուղուց օգտվելն ուշադրության կենտրոնում գտնվող հարցերից է: Մենք երկու երկրների հաղորդակցական ուղիների և տարանցիկ ճանապարհների վերականգնման շուրջ ծրագիր ենք մշակել, որն արագորեն կիրականացվի: Առաջիկա շաբաթներին մենք ավելի շատ ակտիվություն կտեսնենք երկու երկրների հարաբերությունների բոլոր հարթություններում»:
Աբդոլլահիանը մտահոգություն է հայտնել Հարավային Կովկասում այլ ուժերի ազդեցության և ահաբեկիչների ներկայության առնչությամբ:
«Սիոնիստների ու ահաբեկիչների ներկայությունը մեզ լրջորեն մտահոգում է: Բարձրաձայն հայտարարում ենք ՝թույլ չենք տա օտար երկրներն ազդեն Իրանի և իր հարևանների, այդ թվում՝ Հայաստանի հետ հարաբերությունների վրա: Հաշվի առնելով տարածաշրջանային ճգնաժամերը, ինչպես նաև կորոնավիրուսի ճգնաժամի ավարտը, մենք պետք է հայտարարենք, որ մեր տարածաշրջանը առավելապաշտություններ չի հանդուրժելու: Տարածաշրջանի բոլոր երկրները պետք է գան այն համոզման, որ տարածաշրջանի խնդիրները պետք է կարգավորվեն առանց օտարների միջամտության», ասել է Իրանի արտգործնախարարը:
Հետևեք մեզ տելեգրամում
