Իրանի ճանապարհների և քաղաքաշինության նախարար Ռոստամ Ղասեմին և նրա տեղակալ Խեյրոլլահ Խադեմին անդրադարձել են Հայաստանի՝ հյուսիսը հարավին կապող տարանցիկ ուղիների տարածաշրջանային և միջազգային ռազմավարական նշանակությանը:
Twitter-ում արած գրառման մեջ նախարար Ղասեմին հայտնել էր, որ նախարարության տեղակալներին հատուկ հանձնարարության է տրվել, որով Նորդուզից Հայաստան երթուղու և Կովկասի միջանցքի խնդիրը շուտով կլուծվի: «Կովկասի միջանցք» արտահայտության տակ նկատի ունենալով Իրանը Սև ծովին կապող տարանցիկ ուղին՝ Ղասեմին նշել է, որ շուտով այդ շրջանի տարանցիկ պատկերը ամբողջովին կփոխվի։
«Մարդիկ, ովքեր այս ուղղությամբ չարագործություններ էին անում, թող իմանան՝ մեր առջև ոչ մի ճանապարհ փակված չի մնա, սակայն նրանց հետևից քանդված կամուրջները հեշտությամբ չեն վերանորոգվի»,-հավելել է իրանցի նախարարը։
Իսկ փոխնախարար Խեյրոլլահ Խադեմին պետական IRNA գործակալությանը տված հարցազրույցում հայտնել է, որ Իրանը պատրաստ է աջակցել Հայաստանին այլընտրանքային ճանապարհի արագ կառուցման հարցում, որի շուրջ լավ լուծումներ են դիտարկվել հայ գործընկերների հետ:
Նա նշել է, որ բացի Գորիս-Կապանի 21 կմ հատվածին այլընտրանքային ճանապարհի կառուցումից, երկարաժամկետ հեռանկարում ծրագրվում է Հյուսիս-Հարավ ավտոմայրուղու հարավային հատվածի կառուցումը:
«Իրանից Հայաստանի սահման և այնտեղից դեպի Վրաստան ու Կովկասի սահման հաղորդակցական ուղին տարածաշրջանային, միջազգային և ռազմավարական կարևոր միջանցք է, և Հայաստանն ու Իրանը այն պետք է բաց պահեն», – շեշտել է Իրանի ճանապարհների և քաղաքաշինության փոխնախարարը:
Հետևեք մեզ տելեգրամում
