Սիրիայի նախագահ Ասադի վարչակարգը զինված ուժեր է կենտրոնացրել երկրի հյուսիսում՝ Հալեպում Թուրքիայի կողմից հովանավորվող ազգային բանակի վերահսկողության տակ գտնվող տարածքների սահմանին: Նոր տեղակայված սպառազինությունների շարքում են հրետանի և T-90 տանկեր: Այս մասին տեղեկացնում է Մարդու իրավունքների Սիրիայի դիտարանը: Նման զարգացումները համընկել են Թուրքիայից հնչող այն սպառնալիքների հետ, համաձայն որոնց՝ Թուրքիան ռազմական գործողություն է իրականացնելու Սիրիայի հյուսիսում և հյուսիս-արևելքում:
Մարդու իրավունքների Սիրիայի դիտարանը ավելի վաղ զեկուզել էր, որ Սիրիայում գտնվող թուրքական ուժերի առանցքային ստորաբաժանումներին հրաման է տրված ցուցաբերել պատրաստվածության բարձր աստիճան: Այս հրամանին նախորդել էր Էրդողանի հայտարարությունը՝ Սիրիայի հյուսիսում «ահաբեկիչներին» ջախջախելու Թուրքիայի հանձնառության վերաբերյալ:
Ինչպես հաղորդում է աղբյուրը՝ թուրքական ուժերը հարվածներ են հասցրել քրդերի կողմից վերահսկվող տարածքներին՝ թիրախավորելով Հալեպի հյուսիսում Ալ-Մալիքիյահ և Քալաաք Ալ-Շավարղահ գյուղերում տեղակայված նրանց դիրքերը:
Հետևեք մեզ տելեգրամում
