ԱՄԷ-ն կոչ է արել իր քաղաքացիներին հեռանալ Լիբանանից այն բանից հետո, երբ Լիբանանի տեղեկատվության նախարար Ժորժ Կորդահիի հայտարարության պատճառով էմիրությունները Բեյրութից հետ կանչեց իր դեսպանին: Այս մասին տեղեկացնում են արաբական ԶԼՄ-ները:
«Վերջին իրադարձությունների հետևանքով արտգործնախարարությունը Լիբանանում գտնվող իր քաղաքացիներին կոչ է անում որքան հնարավոր է արագ վերադառնալ ԱՄԷ»,- ասված է էմիրությունների ԱԳՆ-ի տարածած հայտարարության մեջ:
Նշենք, որ լիբանանյան դիվանագիտական ճգնաժամի պատճառ է դարձել Լիբանանի տեղեկատվության նախարար Ժորժ Կորդահիի՝ Al Jazeera-ին տված հարցազրույցը, որտեղ նա Եմենում տիրող իրավիճակի պատճառ է համարել Սաուդյան Արաբիայի ագրեսիվ քաղաքականությունը: Ի պատասխան այս հայտարարության՝ Սաուդյան Արաբիան խորհրդակցությունների համար հոկտեմբերի 29-ին իր դեսպանին Բեյրութից հետ է կանչել, ինչպես նաև պահանջել Ռիյադում Լիբանանի դեսպանին լքել թագավորության տարածքը: Սաուդյան Արաբիան դադարեցրել է նաև Լիբանանից ներկրումը:
Սաուդյան Արաբիային են հետևել նաև Ծոցի մյուս երկրները: Բահրեյնը, Քուվեյթը և ԱՄԷ-ն հետ են կանչել իրենց դեսպաններին Բեյրութից «ի աջակցություն Ռիյադի»: Իսկ Ծոցի համագործակցության խորհրդի մյուս երկրները հայտարարել են, որ պատրաստ են խզել դիվանագիտական հարաբերությունները Լիբանանի հետ:
Հիշեցնենք, որ չնայած Ծոցի երկրների հետ դիվանագիտական ճգնաժամի՝ Ժորժ Կորդահին հոկտեմբերի 31-ին Al-Jadeed TV-ին տված հարցազրույցում հայտարարել է, որ չի պատրաստվում հրաժարական տալ:
Հետևեք մեզ տելեգրամում
