ՀՀ տարածքային կառավարման և ենթակառուցվածքների նախարար Գնել Սանոսյանն առաջիկայում կմեկնի Իրանի Իսլամական Հանրապետություն։ Ինչպես հայտնում է գերատեսչության մամուլի ծառայությունը՝ նախարարի այցի մանրամասներն այսօր քննարկվել են ԻԻՀ արտակարգ և լիազոր դեսպան Աբբաս Զոհուրիի հետ հանդիպման ժամանակ։
Զրույցի ընթացքում անդրադարձ է կատարվել նաև տարածաշրջանային զարգացումներին։ Դեսպանն ընդգծել է, որ Սյունիքի մարզը կարևոր է նաև իրենց համար, և առաջիկայում նախատեսվում են տարբեր պատվիրակությունների փոխայցեր, որոնք կկարողանան իրենց մասնակցությունն ունենալ Սյունիքի մարզում իրականացվող տարբեր նախագծերին։
Նախարարն անդրադարձել է մարզում իրականացվող ճանապարհաշինական աշխատանքներին` իրանցի դիվանագետին ներկայացնելով դրանց ընթացքը։
Կողմերը քննարկել են տարածաշրջանային համագործակցության, տրանսպորտային և էներգետիկ ենթակառուցվածքների ոլորտում համատեղ ծրագրերի իրականացման հեռանկարները։ Մտքեր են փոխանակվել նաև ԵԱՏՄ շրջանակում համագործակցությունն ընդլայնելու, ինչպես նաև որպես ԵԱՏՄ անդամ Հայաստանի միջոցով միության շուկա Իրանի մուտք գործելու հեռանկարի շուրջ:
Հետևեք մեզ տելեգրամում
