Միացյալ Նահանգները հաստատել է Սաուդյան Արաբիային 650 միլիոն դոլարի զինամթերքի՝ երկինք-երկինք հրթիռների (AMRAAM) և հարակից այլ սպառազինությունների վաճառքը, հայտնում է Պենտագոնը:
Զինամթերքի նման քանակի վաճառքը Բայդենի վարչակարգի առաջին խոշոր ռազմական գործարքն է Սաուդյան Արաբիայի թագավորության հետ:
«Այս գործարքը աջակցելու է ԱՄՆ-ի արտաքին քաղաքականությանն ու ազգային անվտանգությանը Մերձավոր Արևելքում՝ օգնելով բարելավել բարեկամ երկրի անվտանգությունը, որը շարունակում է կարևոր ուժ մնալ տարածաշրջանի տնտեսական և քաղաքական առաջընթացի համար»,- ասված է Պենտանգոնի տարածած հայտարարության մեջ:
Թեև Սաուդյան Արաբիան ԱՄՆ-ի համար կարևոր գործընկեր է Մերձավոր Արևելքում, ԱՄՆ օրենսդիրները քննադատել են թագավորության ներգրավվածությունը Եմենի պատերազմում: Օրենսդիրները հրաժարվում էին սպառազինությունների վաճառք իրականացնել՝ առանց երաշխավորումների, որ դրանք չեն կիրառվելու խաղաղ քաղաքացիների դեմ:
«Վաճառքն ամբողջությամբ համահունչ է ԱՄՆ նախագահի վարչակազմի՝ Եմենում հակամարտությանը վերջ դնելու քաղաքականության հետ»,- հայտարարել է պետքարտուղարի խոսնակն՝ ավելացնելով, որ «երկինք-երկինք (AMRAAM) հրթիռներն օգնելու են Սաուդյան Արաբիային պաշտպանել երկիրն Իրանի կողմից աջակցություն վայելող հութիների օդային հարձակումներից»:
Նշենք, որ գործարքը ներառում է նաև այլ սպառազինություններ, զենքերի պահեստային և վերանորոգման մասեր, ԱՄՆ կառավարության և կապալառուների ինժեներական, տեխնիկական և նյութատեխնիկական աջակցության ծառայություններ:
Հետևեք մեզ տելեգրամում
