Լիբանանի շիայական Հեզբոլլահ կուսակցության քարտուղարի տեղակալ շեյխ Նայիմ Կասիմը կոչ է արել Սաուդյան Արաբիային չմիջամտել Լիբանանի ներքին գործերին: Այս մասին գրում են լիբանանյան ԶԼՄ-ները:
«Լիբանանն անկախ երկիր է, որը ենթակայություն չի հանդուրժելու»,- նոյեմբերի 10-ին հայտարարել է շեյխ Կասիմը:
Անդրադառնալով Սաուդյան Արաբիայի և Պարսից Ծոցի համագործակցության խորհրդի մյուս երկրների հետ դիվանագիտական ճգնաժամին՝ Կասիմը Սաուդյան Արաբիային է մեղադրել լարվածության առաջացման և դրա հետագա խորացման համար:
«Մենք ավելին չենք պահանջում (Սաուդյան Արաբիայից): Մենք պարզապես պահանջում ենք դադարել միջամտել մեր ներքին գործերին»,- հավելել է Կասիմը:
Նշենք, որ հոկտեմբերի 29-ին Սաուդյան Արաբիան Բեյրութից հետ էր կանչել իր դեսպանին: Նրան հետևել էին նաև ԱՄԷ-ն, Քուվեյթը, Բահրեյնը և Եմենը՝ ի նշան Լիբանանի տեղեկատվության նախարար Ժորժ Կորդահիի՝ Եմենի պատերազմում Սաուդյան Արաբիայի վարած քաղաքականության քննադատության:
Հետևեք մեզ տելեգրամում
