Իրանի փոխարտգործնախարար Ալի Բաղերի Քանին հայտնել է, որ Թեհրանը Վիեննայի բանակցող կողմերին է ներկայացրել պատժամիջոցների վերացման և միջուկային գործողությունների սահմանափակման վերաբերյալ իրանական կողմի առաջարկները, գրում է IRNA-ն:
Քանիի խոսքով՝ պատժամիջոցների վերացման և միջուկային գործողությունների սահմանափակման հարցերով զբաղվող հանձնաժողովները համատեղ նիստ են անցկացնելու, որից հետո անցկացվելու է նաև Համաձայնագրի հարցով հանձնաժողովի նիստը: Նիստի ընթացքում քննարկվելու է բանակցությունների հետագա ընթացքը:
Հիշեցնենք, որ նոյեմբերի 29-ին Վիեննայում վերսկսվել են իրանական միջուկային գործարքի վերաբերյալ Գործողությունների համատեղ համապարփակ ծրագրի (ԳՀՀԾ) շուրջ բանակցությունները: Դրանց նպատակը 2015 թվականին ստորագրված միջուկային համաձայնության վերականգնումն է, որի իրականացումը դադարեցվել էր Դոնալդ Թրամփի որոշմամբ, երբ ԱՄՆ-ը դուրս էր եկել համաձայնագրից: Բանակցությունների այս փուլին Միացյալ Նահանգներն անմիջական մասնակցություն չունի, սակայն ակտիվորեն ներգրավված է դիվանագիտական խողովակներով:
Հետևեք մեզ տելեգրամում
