Դեկտեմբերի 5-ին Ֆրանսիայի նախագահ Էմանուել Մակրոնը և Սաուդյան Արաբիայի թագաժառանգ Մուհամմադ Սալմանը համատեղ հեռախոսազրույց են ունեցել Լիբանանի վարչապետ Նաջիբ Միկաթիի հետ Մարկոնի՝ Ռիյադ կատարած պաշտոնական այցի շրջանակներում:
Միկաթիի հետ հեռախոսազրույցի ընթացքում Մակրոնն ընդգծել է, որ Ֆրանսիան և Սաուդյան Արաբիան իրենց պատրաստակամությունն են արտահայտում Լիբանանին աջակցություն ցուցաբերելու համար՝ չնայած Բեյրութի նկատմամբ Իրանի ազդեցությանը:
«Մենք պատրաստակամ ենք աջակցելու Լիբանանի ժողովրդին և անել հնարավոր ամեն ինչ, առևտրային և տնտեսուկան կապերի վերակտիվացման համար:»,- ասել է Մակրոնը լրագրողներին՝ նախքան Ռիյադ մեկնելը:
Նա նաև հավաստիացրել է, որ Ֆրանսիան և Սաուդյան Արաբիան շարունակելու են միասին աշխատել՝ Լիբանանին ցուցաբերելու անհրաժեշտ հումանիտար աջակցություն երկրում տիրող տնտեսական ճգնաժամի մեղմացման համար:
«Մենք նաև ցանկանում ենք, որ Լիբանանի կառավարության բնականոն աշխատանքները վերականգնվեն և ի վերջո իրագործվեն անհրաժեշտ բարեփոխումները»,- հավելել է Ֆրանսիայի նախագահը:
Իր հերթին Միկաթին համատեղ հեռախոսազրույցը շատ կարևոր քայլ է համարել «Ռիյադի հետ պատմական հարաբերությունները վերականգնելու» համար: Նշենք, որ սա Միկաթիի՝ վարչապետի պաշտոնը ստանձնելուց հետո առաջին հեռախոսազրույցն էր Լիբանանի ավանդական դաշնակից Սաուդյան Արաբիայի թագաժառանգի հետ:
Նշենք, որ Ֆրանսիայի նախագահը պաշտոնական այցով մեկնել էր Ռիյադ: Քննարկվող հարցերի օրակարգում էր նաև Լիբանանի և Պարսից ծոցի որոշ երկրների միջև դիվանագիտական ճգնաժամի հարթեցումը: Մակրոնի այցին ընդառաջ հրաժարական էր տվել Լիբանանի տեղեկատվության նախարար Ժորժ Կորդահին, ով քննադատել էր Սաուդյան Արաբիայի դերակատարությունը Եմենի պատերազմում: Այդ քննադատությունն առիթ էր դարձել դիվանագիտական ճգնաժամի համար: Կորդահիի հայտարարությունից անմիջապես հետո Սաուդյան Արաբիան հետ կանչեց իր դեսպանին Բեյրութից և պահանջեց, որ Լիբանանի դեսպանն էլ հեռանա Ռիյադից: Դիվանագիտական ճգնաժամը ավելի խորացավ, երբ ի աջակցություն Սաուդյան Արաբիայի՝ Պարսից ծոցի որոշ երկրներ նույնպես հետ կանչեցին իրենց դեսպաններին:
Հետևեք մեզ տելեգրամում
