Հունվարի 18-ին ցուցարարների եւ լիբանանյան հատուկ ծառայությունների միջեւ տեղի ունեցած բախումների պատճառով Բեյրութում առնվազն 370 մարդ է վիրավորվել: AFP գործակալության հաղորդմամբ՝ սա վերջին 3 ամիսներին շարունակվող բողոքի ցույցերի ժամանակ տուժածների ամենամեծ թիվն է: Հայտնի է, որ տուժածներից 142-ը իրավապաշտպան մարմինների ներկայացուցիչներն են։
Բախումները սկսվել են այն բանից հետո, երբ ցուցարարները սկսել են քարեր եւ այլ իրեր նետել ոստիկանության ներկայացուցիչների վրա: Ոստիկանները փակել էին դեպի Ազգային ժողով տանող ճանապարհը: Ցուցարարների մի մասը ոստիկանների վրա է հարձակվել որպես զենք օգտագործելով ճանապարհային նշանները: Ցուցարարների մյուս մասն էլ փորձել է ճեղքել փշալարերով արգելափակոցները, որպեսզի հասնի օրենսդիր օրգանի շենքին: Անվտանգության ուժերը ցուցարարներին ցրելու համար օգտագործել են ջրցան մեքենաներ եւ արցունքաբեր գազ:
Նախորդ օրը Լիբանանի նախագահ Միշել Աունը բանակի հրամանատարներին եւ անվտանգության ծառայություններին խնդրել է Բեյրութի կենտրոնում վերականգնել խաղաղությունը: Բեյրութում եւ երկրի մյուս քաղաքաներում հարկերի և կոռուպցիայի պատճառով հակակառավարական ցույցերը սկսվել են դեռևս հոկտեմբերին: Լիբանանի իշխանությունները հայտարարել են, որ երկրի տնտեսությունում արտակարգ դրություն է:
Հետևեք մեզ տելեգրամում
