Սիրիայի հարցերով Աստանայի ձևաչափի շրջանակներում անցկացվող բանակցությունների 17-րդ փուլն ավարտվել է դեկտեմբերի 22-ին: Այս մասին տեղեկացնում է սիրիական SANA լրատվական գործակալությունը:
Հանդիպմանը մասնակցել են երաշխավոր պետությունների՝ Ռուսաստանի, Թուրքիայի և Իրանի ներկայացուցիչները, ինչպես նաև Սիրիայի իշխող վարչակարգի և ընդդիմության պատվիրակությունները: Իսկ Լիբանանը, Հորդանանը և Իրաքը մասնակցել են բանակցություններին որպես դիտորդներ՝ դեսպանների մակարդակով:
ՌԴ ներկայացուցիչ Ալեքսանդր Լավրենտևը հաստատել է, որ ռուսական կողմն ակտիվորեն համագործակցում է Թուրքիայի հետ Սիրիայի հյուսիսում կայունության պահպանման համար՝ հավելելով, որ Անկարան չի իրականացրել իր բոլոր պարտավորությունները:
Լավրենտևի խոսքով՝ բոլոր կողմերը անհանգստացած են Սիրիայում իրավիճակի կայունության համար, և այդ պատճառով էլ Աստանայի գործընթացի երաշխավոր պետությունները վերահաստատում են իրենց ստանձնած պարտավորությունները Սիրիայի ինքնիշխանության և տարածքային ամբողջականության պահպանման համար: Թուրքական պատվիրակության հետ հանդիպման ժամանակ նա ընդգծել է, որ անհրաժեշտ է լուծել Սիրիայի տարածքային ամբողջականության առնչվող խնդիրները:
Սիրիայի իշխող վարչակարգի պատվիրակությունը, որը գլխավորում է փոխարտգործնախարար Այման Սուսանը, Անկարային է մեղադրել ճգնաժամի կարգավորման գործընթացի առաջընթացին խոչընդոտելու համար:
Աստանայի գործընթացի շրջանակներում Իրանի ներկայացուցիչ Ալի Ասղար Հաջը նույնպես երկկողմ հանդիպում է ունեցել ՌԴ ներկայացուցչի հետ, որի ընթացքում կողմերը քննարկել են Սիրիայում ընթացող զարգացումների նկատմամբ Մոսկվայի և Թեհրանի դիրքորոշումները:
Հաղորդվում է, որ Ռուսաստանը, Իրանը և Թուրքիան պայմանավորվել են Աստանայի ձևաչափով հաջորդ գագաթնաժողովն անցկացնել Թեհրանում 2022 թվականի փետրվար-մարտ ամիսներին՝ կախված կորոնավիրուսային համաճարակի հետ կապված իրավիճակից։
Իսկ Աստանայի ձևաչափի շրջանակներում Սիրիայի սահմանադրական հանձնաժողովի հերթական հանդիպումը կկայանա հաջորդ տարի հունվարին:
Հիշեցնենք, որ դեկտեմբերի 21-ին Ղազախստանի մայրաքաղաք Նուր Սուլթանում մեկնարկել է Սիրիայի հարցերով Աստանայի ձևաչափի շրջանակներում բանակցությունների 17-րդ հերթական հանդիպումը:
Հետևեք մեզ տելեգրամում
