Ադրբեջանական զինուժը կրակ է բացել Արցախի Մարտունու շրջանի Կարմիր Շուկա գյուղի ուղղությամբ։ Տեղեկությունը Sputnik Արմենիայի հետ զրույցում հաստատել է Արցախի ՄԻՊ Գեղամ Ստեփանյանը։
Նրա խոսքով` տուժածներ չկան, ադրբեջանական կրակոցների հետևանքով հրդեհվել է գյուղի բնակիչներից մեկի ավտոմեքենան, որ կայանված է եղել մանկապարտեզի մոտ։
«Իրավապահները հիմա մեկնում են դեպքի վայր»,–ասել է Արցախի ՄԻՊ-ը։
Միջադեպի մասին տեղեկություն է հաղորդել նաև Արցախի Հանրապետության պաշտպանության բանակը։
«Միջադեպի առնչությամբ համապատասխան տեղեկատվություն է տրամադրվել ռուսական խաղաղապահ զորակազմի հրամանատարությանը և ձեռնարկվել են միջոցներ՝ ադրբեջանական կողմին հրադադարի պահպանման ռեժիմին վերադարձնելու ուղղությամբ»,–ասված է ՊԲ հաղորդագրության մեջ:
Գերատեսչությունից հերքել են ադրբեջանական ԶԼՄ–ների տարածած լուրը, համաձայն որի ՊԲ-ի ստորաբաժանումներն ավտոմեքենայից կրակ են բացել ադրբեջանական դիրքերի ուղղությամբ։
«Հերթական ապատեղեկատվությունն է և չի համապատասխանում իրականությանը»,–ասված է հաղորդագրության մեջ։
Հետևեք մեզ տելեգրամում
