Մեր խաղաղապահների վրա ստվեր գցել չի ստացվի։ Նրանց աշխատանքը համակարգված է, հստակ է և բխում է ճգնաժամի կարգավորման շահերից։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ պատասխանելով հարցին, թե արդյոք Ադրբեջանը փորձում է ստվեր գցել Արցախում ռուս խաղաղապահների գործունեության վրա՝ սադրանքներ կազմակերպելով Արցախում քաղաքացիական բնակչության դեմ։
«Ինչ վերաբերում է կոնկրետությանը, ապա ավելի ճիշտ կլինի այս հարցն ուղղել Ղարաբաղում ռուսական խաղաղապահ զորախմբի ներկայացուցիչներին։ Մեր խաղաղապահները մշտական կապի մեջ են երկու կողմերի հետ և անհրաժեշտության դեպքում հետաքննում են միջադեպերը»,-ասել է նա։
Նշենք, որ հունվարի 10-ին ադրբեջանական կողմը կրկին կոպտորեն խախտել է հրադադարի ռեժիմը՝ կրակ արձակելով Արցախի Հանրապետության Մարտունու շրջանի Կարմիր շուկա, Թաղավարդ և Ասկերանի շրջանի Նախիջևանիկ համայնքների քաղաքացիական բնակչության և քաղաքացիական օբյեկտների ուղղությամբ։
Հետևեք մեզ տելեգրամում
