Թուրքիայի խորհրդարանը վավերացրել է Ադրբեջանի հետ դաշնակցային հարաբերությունների մասին այսպես կոչված «Շուշիի հռչակագիրը», գրում է ermenihaber-ը:
Հռչակագրի վավերացման նպատակահարմարության վերաբերյալ օրինագիծը ներկայացվել էր խորհրդարանի նախագահ Մուստաֆա Շենթոփի ստորագրությամբ։ Այն նախ ստացել էր Թուրքիայի խորհրդարանի արտաքին կապերի հանձնաժողովի հավանությունը։
Հիշեցնենք, որ 2021 թվականի հունիսի 15-ին Թուրքիայի և Ադրբեջանի նախագահներ Ռեջեփ Թայիփ Էրդողանի ու Իլհամ Ալիևի ստորագրած հռչակագրում հղում է կատարվում նաև շուրջ 100 տարի առաջ ստորագրված Կարսի պայմանագրին։ Դրանում շեշտվում է, որ երկու երկրները միմյանց անհրաժեշտ օգնություն են ցուցաբերելու երրորդ երկրի սպառնալիքի կամ հարձակման դեպքում։
Ընդգծվում է, որ Թուրքիայի նկատմամբ Հայաստանի «անհիմն պնդումները» վնասում են տարածաշրջանի խաղաղությանն ու կայունությանը: Նշվում է, որ «Թուրքիան ու Ադրբեջանը միացնող Զանգեզուրի միջանցքի բացումը և Նախիջևան-Կարս երկաթուղին կնպաստեն հարաբերությունների առավել ակտիվացմանը»:
Հետևեք մեզ տելեգրամում
