Փետրվարի 6-ին Սաուդյան Արաբիայի արտգործնախարար Ֆայսալ բըն Ֆարհան Ալ-Սաուդը և Իրաքի ԱԳ նախարար Ֆուադ Հուսեյնը հեռախոսազրուցի ընթացքում քննարկել են իրանա-սաուդական բանակցությունների հինգերորդ փուլի հետաձգման պատճառները։
Իրաքի արտգործնախարարը հավաստիացրել է, որ Բաղդադը շարունակելու է ջանքեր գործադրել Ռիյադի և Թեհրանի միջև փոխըմբռնման հասնելու համար։
Կողմերը քննարկել են նաև Իրաքի և Սաուդյան Արաբիայի միջև երկկողմ հարաբերությունները, համագործակցության ամրապնդման ուղիները, ինչպես նաև տարածաշրջանում կայունությանն ու անվտանգությանն առնչվող խնդիրները։
Նշենք, որ Իրանի ԱԳՆ խոսնակ Սաիդ Խաթիբզադեն ավելի վաղ հայտնել էր, որ Թեհրանը պատրաստակամ է շարունակել Սաուդյան Արաբիայի հետ բանակցությունների հերթական փուը Բաղդադում՝ ավելացնելով, որ դրանց շարունակումը կախված է թագավորության կամքից և պատրաստակամությունից։
Հիշեցնենք, որ Բաղդադում անցկացվել է իրանա-սաուդական բանակցությունների չորս փուլ, որոնք միտված էին Թեհրանի և Ռիյադի միջև հարաբերությունների կարգավորմանը։ Իսկ երկոկղմ հարաբերությունները վատթարացել էին 2016թվականին, երբ Սաուդյան Արաբիան խզեց դիվանագիտական հարաբերությունները Իրանի հետ՝ Թեհրանում իր դեսպանատան և Մաշհադ քաղաքում գործող հյուպատոսարանի վրա իրականացված հարձակումներից հետո։Հարձակումները կազմակերպվել էին ի նշան բողոքի՝ Ռիադի կողմից սաուդցի շիա հոգևորական Նիմր ալ-Նիմրին ահաբեկչության մեջ մեղադրելու համար։ Այս ամենից հետո Պարսից ծոցի երկրները ՝ Սաուդյան Արաբիայի գլխավորությամբ, մեղադրում են Իրանին տարածաշրջանում ծավալապաշտական օրակարգ ունենալու և արաբական երկրների, այդ թվում՝ Իրաքի, Եմենի, Լիբանանի և Սիրիայի ներքին գործերին միջամտելու մեջ։ Թեհրանը հերքում է այս մեղադրանքները և հայտարարում,որ հավատարիմ է հարևան երկրների հետ բարիդրացիական հարաբերություններ ունենալու սկզբունքին։
Հետևեք մեզ տելեգրամում
