Ադրբեջանի ՊՆ-ում երեք սպաներ են ձերբակալվել

Ադրբեջանի պաշտպանության նախարարության երեք զինծառայողներ ձերբակալվել են առանձնապես խոշոր չափերի յուրացման մեղադրանքով, հայտնում են ադրբեջանական լրատվամիջոցները։

Ավելի վաղ հաղորդվել էր, որ Ադրբեջանի պետական անվտանգության ծառայությունը ձերբակալել է ՊՆ ֆինանսական վարչության պետ, գնդապետ Ռաֆայել Խալաֆովին։ Նրան մեղադրանք է առաջադրվել Քրեական օրենսգրքի 179.4 հոդվածով (առանձնապես խոշոր չափերով յուրացում): Մասնավորապես, նա կասկածվում է ավելի քան կես միլիոն մանաթ (մոտ 300 հազար դոլար) յուրացման մեջ։

Այժմ ձերբակալվել են Ադրբեջանի ՊՆ ցամաքային զորքերի ֆինանսական բաժնի պետ Բայրամով Բայրամ Խալիլ օղլուն (մեղադրվում է 2 միլիոն 635 հազար մանաթ (1,5 միլիոն դոլար) յուրացման մեջ), Սերկերովի զորամասի ֆինանսական բաժնի պետ Ֆարահիմ Ֆազիլ օղլուն և սպա Ալիզադե Վուսալ Ադալաթ օղլուն։