Լիբանանում գործող «Հեզբոլլահ» կուսակցության առաջնորդ Հասան Նասրալլահը հայտարարել է, որ իրենց սպառազինության տակ եղած չկառավարվող հրթիռները կարող են վերածվել կառավորվող ճշգրիտ հրթիռների: Նրա խոսքերով՝ իրենք արդեն մի քանի տարի զբաղվում են անօդաչու թռչող սարքերի արտադրությամբ:
«Մենք այժմ կարող ենք մեր հազարավոր չկառավարվող հրթիռները փոխակերպել ճշգրիտ կառավարվող հրթիռների», – հայտարարել է Նասրալլահը՝ նշելով, որ նման հրթիռները տեղակայված են ողջ Լիբանանում և չեն պահվում միայն մեկ վայրում:
«Հեզբոլլահի» առաջնորդը նաև հաստատել է, որ իր կուսակցությունն արդեն մի քանի տարի է, ինչ արտադրում է անօդաչու թռչող սարքեր: Նրա խոսքով՝ կուսակցությունը պատրաստվում է սկսել նման ինքնաթիռների վաճառքը։
Նասրալլահը նաև հայտարարել է, որ «Հեզբոլլահը» բարելավել է իր ռազմական կարողությունները: Մասնավորապես, նա հիշեցրել է, որ անցյալ ամառ «Հեզբոլլահի» մարտիկներն անցկացրել են ամենամեծ զորավարժությունները 1982 թվականին խմբավորման ստեղծման օրվանից ի վեր:
Ինչ վերաբերում է գալիք խորհրդարանական ընտրություններին, Նասրալլահն ընդգծել է, որ «Լիբանանում բոլոր ընտրական փուլերը չափազանց կարևոր են» և նշել, որ «Հեզբոլլահը» կողմ է ընտրությունների ճիշտ ժամանակին անցկացմանը:
Հետևեք մեզ տելեգրամում
