Գերմանիայի կանցլեր Օլաֆ Շոլցը պաշտոնական այց է կատարել Իսրայել, որտեղ հանդիպել է վարչապետ Նաֆթալի Բեննեթի հետ:
Ուշագրավ է, որ սա Օլաֆ Շոլցի առաջին պաշտոնական այցն է Իսրայել՝ կանցլերի պաշտոնը ստանձնելու ի վեր:
Հանդիպման ընթացքում կարևորվել են երկկողմ հարաբերությունները, ինչպես նաև երկու երկրների միջև համագործակցության ամրապնդման ուղիները: Անդրադառնալով Թեհրանի միջուկային ծրագրին՝ Գերմանիայի կանցլերը նշել է, որ Իրանի հետ միջուկային նոր համաձայնագիրը «այլևս չի կարող հետաձգվել»:
«Հիմա ժամանակն է որոշում կայացնելու: Այն չպետք է այլև հետաձգվի»,- հայտարարել է Շոլցը հանդիպումից հետո կայացած համատեղ մամուլի ասուլիսում:
Կողմերը քննարկել են նաև Ուկրաինայում ընթացող զարգացումները: Այս համատեքստում ղեկավարները կոչ են արել անհապաղ դադարեցնել ռազմական գործողությունները և ճգնաժամից դուրս գալու համար դիվանագիտական ուղիներ փնտրել:
«Մենք ռազմական ներգրավվածություն չենք ունենա: Սա վերաբերում է նաև ՆԱՏՕ-ին և մյուսներին: Այս իրավիճակում դա սխալ որոշում կլինի։ Բայց մենք աջակցություն կցուցաբերենք… Սա է այն որոշումը, որը մենք կայացրել ենք»,- հայտարարել է Շոլցը:
Հետևեք մեզ տելեգրամում
