Իրանի արտաքին գործերի նախարարությունը խստորեն դատապարտել է Իսրայելի ԶՈՒ-ի ավիահարվածները Դամասկոսին, որը հանգեցրել էր երկու զինծառայողների մահվան։ Այս մասին հայտարարել է Իրանի ԱԳՆ-ի խոսնակ Սայիդ Խաթիբզադեն։
Իրանի ԱԳՆ-ի մամուլի ծառայության տարածած հայտարարության մեջ նաև նշած է, որ «իսրայելական ագրեսիայի հետևանքով Սիրիայում նահատակվել են երկու իրանցի խորհրդականներ»։ Խաթիբզադեն ցավակցություններ է հայտնել Իսրայելի զինված ուժերի հարվածի հետևանքով զոհված իրանցի զինվորականների հարազատներին՝ ավելացնելով, որ նման «հանցագործությունն աննկատ չի մնա»։
Նշենք, որ Իրանի իսլամական հեղափոխության պահապանների կորպուսը երեկ հայտարարել էր, որ Իսրայելի կողմից Դամասկոսին հասցված ավիահարվածների հետևանքով երկու իրանցի սպաներ են սպանվել։ Պահապանների կորպուսը հայտարարել է, որ Թել Ավիվը «թանկ է վճարելու»:
Հիշեցնենք, որ երկուշաբթի SANA-ի հաղորդմամբ՝ Իսրայելի զինված ուժերը հրթիռակոծել են Դամասկոսը, որի հետևանքով սպանվել են երկու զինծառայողներ։
Հետևեք մեզ տելեգրամում
